Prokurori i Shteteve të Bashkuara Gregory W. Kehoe njoftoi për ekstradimin në SHBA të kosovarit, Liridon Masurica, 33 vjeçar nga Gjilani.
I njohur edhe si “@blackdb”, Masurica akuzohet për komplot për të kryer mashtrim me pajisjet e aksesit dhe pesë akuza thelbësore për përdorim mashtrues të 15 ose më shumë pajisjeve të aksesit të paautorizuar. Nëse dënohet për të gjitha akuzat, ai mund të përballet me një dënim maksimal prej 55 vitesh në burg federal, bëhet e ditur në njoftim.
Masurica, u arrestua nga autoritetet në Kosovë më 12 dhjetor 2024 dhe u ekstradua më 9 maj në Shtetet e Bashkuara në përputhje me traktatin e ekstradimit midis Shteteve të Bashkuara dhe Republikës së Kosovës.
Ai doli para gjykatës federale në Tampa më 12 maj 2025 dhe u urdhërua të mbahet në paraburgim në pritje të gjyqit.
Sipas aktakuzës, Masurica ishte administratori kryesor i BlackDB.cc – një treg kriminal online në veprim nga viti 2018 deri më sot. BlackDB.cc ofroi në mënyrë të paligjshme për shitje kredencialet e kompromentuara të llogarisë dhe serverit, informacione të kartës së kreditit dhe informacione të tjera personale të identifikueshme të individëve të vendosur kryesisht në Shtetet e Bashkuara, duke përfshirë ata të vendosur brenda Qarkut të Mesëm të Floridës.
Ky hetim u drejtua nga FBI në bashkëpunim me Drejtorinë e Hetimit të Krimit Kibernetik të Policisë së Kosovës.
