Gjykata Penale në Shkup ka shpallur fajtor dhe ka shqiptuar 2 vite dënim me burg për Sulejman Lamallarin, i akuzuar për veprën penale “Dhunë” ndaj kryetares së Shkupit, Danella Arsovska.
Në dënimin e shqiptuar do të llogaritet edhe koha që i akuzuari e ka kaluar në paraburgim.
“Sipas nenit 47 të Kodit Penal, në dënimin me burg të shqiptuar ndaj të pandehurit S.L. i llogaritet edhe koha e kaluar në arrest shtëpiak, e shndërruar në masë arresti. Kundër këtij vendimi palët kanë të drejtë ankese brenda afatit prej tetë ditësh nga marrja e vendimit, përmes kësaj gjykate tek Gjykata e Apelit në Shkup. “.
Gjatë procesit gjyqësor, i akuzuari Lamallari kishte mohuar të ketë sulmuar Arsovskën. Njëkohësisht ai ka deklaruar se ka qenë Arsovska ajo që e ka sulmuar dhe filmuar në mënyrë të paautorizuar. Për këtë rast, së fundmi Lamallari dhe mbrojtja e tij paralajmëruan padi ndaj Arsovskës.
Ndërkohë, në dëshminë e saj, kryetarja e Shkupit, Danella Arsovska, e përshkroi ngjarjen si “agresive dhe të rrezikshme”, ku ajo ishte ndjerë “e kërcënuar, e pasigurt dhe e frikësuar”.
Kryetarja e Qytetit të Shkupit, Danella Arsovska, sipas akuzës u sulmua fizikisht dhe verbalisht më 11 korrik në Çair, pranë “Rrugës së Plastikave”, kur ajo doli të inspektonte ndërtesat e paligjshme dhe lidhjet e paligjshme të ujit dhe energjisë elektrike
