Ministri i Ekonomisë dhe Punës, Besar Durmishi, përmes rrjeteve sociale ka njoftuar për hapjen e masës së re nga Plani Operativ 2025, e cila synon krijimin e vendeve të reja pune përmes investimeve të gjelbra.
“Kjo masë siguron më shumë punësime, e nxit konkurrueshmërinë e kompanive vendore dhe e përshpejton kalimin drejt ekonomisë së gjelbër”, shkruan Durmishi.
Sipas tij, ndërmarrjet mikro, të vogla dhe të mesme të sektorit privat do të mund të aplikojnë për grante të pakthyeshme nga 250.000 deri në 750.000 denarë. Kushti kryesor është hapja e vendeve të reja pune dhe investimi në teknologji, produkte dhe procese të gjelbra.
Më tej shkruan se mbështetja financiare përfshin blerjen e pajisjeve dhe makinerive të reja, teknologji për burime të ripërtëritshme të energjisë, materiale për efikasitet energjetik, si dhe softuer dhe licenca të specializuara.
Durmishi shton se kjo është një mundësi reale për kompanitë që të përfitojnë nga grantet, duke investuar në të ardhmen dhe duke krijuar vende pune cilësore për qytetarët.
