Policia e Shkupit ka parandaluar një grabitje të armatosur në një market në rrugën “Xhon Kenedi” në Çair, ku tre persona tentuan të kryejnë plaçkitje gjatë orëve të para të mëngjesit.
Ngjarja është raportuar në orën 04:52, pas së cilës policia e Njësitit të ndërhyrjes së shpejtë dhe të Stacionit Policor Bit Pazar ka ndërhyrë menjëherë. Duke parë policinë, grabitësit janë përpjekur të arratisen, ndërsa një oficer policie ka shtënë një plumb paralajmërues në ajër.
Pas ndjekjes, dy persona, A.H. (23) dhe E.A. (19), janë arrestuar në vendngjarje, ndërsa një i tretë është ende në kërkim.
Nga MPB njoftojnë se pas dokumentimit të plotë të rastit, ndaj të dyshuarve do të ngrihen kallëzime penale për grabitje të mbetur në tentativë./
