Në prag të ndeshjes së Shqipërisë kundër Serbisë këtë të shtunë, sulmuesi i Burnleyt në Premier Ligë, Armando Broja, ka dalë në konferencë për media, ku ka folur me optimizëm për sfidën dhe objektivin e kuqezinjve për kualifikim në Kupën e Botës.
Broja u ndal te mungesa e golit me fanellën kuqezi, por theksoi se më e rëndësishme se gjithçka është fitorja e skuadrës.
“Për mua më e rëndësishme është të fitojmë ndeshjet dhe të marrim tre pikët. Normalisht që kam qejf të bëj gola, por më bukur është të fitojmë ndeshjen dhe të ndihmoj ekipin,” tha ai.
Sulmuesi shqiptar foli edhe për ndeshjen e shumëpritur ndaj Serbisë, duke theksuar se ekipi është i përgatitur maksimalisht:
“Kjo është një ndeshje futbolli. Është shumë e rëndësishme, por ne jemi shumë të fokusuar sepse është ndeshje e madhe. Luajmë jashtë shtëpie. Bashkë si skuadër do bëjmë çfarë duhet në fushë.”
Ai shtoi se është gati të japë maksimumin në çdo pozicion:
“Ka mundësi të bëj gola edhe në krahun e djathtë të sulmit. Unë kam dëshirë vetëm të ndihmoj ekipin. Edhe trajneri më thotë që duhet të jem i përqendruar, sepse rasti do të dalë. Në ndeshje mund të ketë vetëm një rast dhe duhet të jem i fokusuar te ai rast për të shënuar.”
Sa i përket kualifikimeve, Broja mbetet i bindur se gjithçka është e hapur:
“Kemi shanse maksimale. Është grup i vështirë, sepse kemi dhe Anglinë. Do të luftojmë deri në fund. Kjo është ndeshje shumë e rëndësishme dhe jemi të fokusuar ta fitojmë.”
Përballja Serbi–Shqipëri zhvillohet të shtunën në orën 20:45, dhe mund të ndiqet në Klan Kosova, me emision para dhe pas ndeshjes.
