Dilemat politike në VLEN, Taravari: Nuk do të takohem me Ai Ahmetin

Pavarësisht se pas mbledhjes së mbrëmshme të koalicionit VLEN, u tha se nuk ka mosmarrëveshje brenda koalicionit dhe se ai qëndron kompakt dhe i bashkuar, ende mbetet e paqartë nëse koalicioni do të garojë me lista të përbashkëta, si një subjekt i vetëm në zgjedhjet e ardshme lokale. I pyetur sot se si do të bashkëpunojnë në zgjedhje dhe si janë raportet e koalicioni, ministri i Shëndetësisë dhe njëri ndër liderët e VLEN-it, Arben Taravari tha sot se po vazhdojnë negociatat dhe se do të dalin publikisht me qëndrimet e tyre. Ndërkaq, ai mohoi se po zhvillon takime me liderin e BDI-së, Ali Ahmeti.

Gazetari: A jeni takuar me Ali Ahmeti në këto kohë?

Arben Taravari: Jo

Gazetari: A do të takoheni?

Arben Taravai: Jo

Liderët e koalicionit VLEN u takuan mbrëmë në selinë në Shkup, ku për rreth dy orë, diskutuan mbi zhvillimet e fundit në këtë subjekt politik. Edhe pse, para takimit u tha se, në këtë mbledhje do të përcaktohet se si do të dalin në zgjedhjet e ardhshme lokale, mbledhja nuk rezultoi me një vendim përfundimtar.

Pas takimit, Bekim Qoku nga VLEN, mohoi se ka pasur mosmarrëveshje dhe tha se Taravari vazhdon të jetë pjesë e koalicionit.

Bekim Qoku, VLEN

“Absolutisht. Ne jemi bashkë. Ne jemi VLEN dhe vazhdojmë si subjekt i përbashkët dhe siç thash mbeten vetëm të diskutohen detajet dhe të diskutohen komunat se si do të ndahen në mënyrën më të mirë të mundshme. Ne nuk kemi pasë mosmarrëveshje. Kemi pasë mendime të ndryshme ku në çdo subjekt politik ndodhin. Qoku për Taravarin: Ne jemi bashkë, ne jemi VLEN”.

Përplasjet brenda koalicionit VLEN shpërthyen pas kritikave publike të Taravarit të bëra gjatë një interivste, ku tha se koalicioni ka shumë mangësi, po punon shumë ngadalë dhe mospërputhjet e koalicionit shihen nga 100 kilometra larg.