“Akuza për dhunë do të rëndon ndaj 8 personave që ditë më parë sulmuan nxënësit në shkollën e mesme 8 shtatori. Njeri prej tyre ka përfunduar në paraburgim, ndërsa 7 të tjerë do të ndiqen në bazë të Ligjit për të miturit”, raporton gazetari i Alsat, Bashkim Sulejmani.
“Personit të moshës madhore i është caktuar masa paraburgim afatshkurtër 48 orësh, me qëllim sigurimin e provave për pjesëmarrjen e tij në ngjarje. Për të miturit, procesi do të zhvillohet si Ligjit për drejtësi për fëmijët”, thonë nga Prokuroria Publike, Tetovë.
Më 3 shtator në rrugën “Prilepska”, në Tetovë, policët e stacionit të Tetovës, kanë privuar nga liria, personin N.Ç. 20 vjeç nga Tetova, ndërsa një ditë më vonë, në rrugën e “Ilindenit” është privuar nga liria edhe personi D. D., 23 vjeç, nga fshati Radiovcë.
Ndërkohë, bisedë informative është zhvilluar me 16 persona dhe që të gjithë të mitur lidhur me rrahjen e dy nxënësve të ekonomikut, të cilët dyshohen se rreth orës 18:00, në rrugën “Bllgoja Toska”, në Tetovë, në grup, kanë sulmuar fizikisht një 17 vjeçar dhe një 15 vjeçar, që të dy nga fshati Dobrosht i Komunës së Tearcës.
Nxënësit, sipas raportit të SPB-së, në atë moment kanë qenë duke dalë nga shkolla ndërsa janë shoqëruar edhe nga një i mitur tjetër, i cili ka arritur ti ik ngjarjes. Sipas nxënësve të rrahur por edhe prindërve të tyre, rrahja dyshohet të jetë kryer nga pjesëtarë apo tifozë të një tifo grupi të një klubi fudbollistik të Tetovës. Motivet nuk janë bërë të ditura akoma, por hetuesit nuk përjashtojnë mundësinë e urrejtjes. / Alsat.mk
