Kuvendi i Maqedonisë së Veriut nuk e votoi propozimin e Levicës për ndryshim të ligjit për konsumatorët, propozimin për shfuqizimin e obligimit për deklaratat dygjuhësore të produkteve. Deputeti Sashko Jançev nga kjo parti, në elaborimin e këtij propozimi tha se, ky obligim nuk është në përputhje me Kushtetutën si dhe dëmton drejtëpërdrejt prodhuesit dhe tregtarët maqedonas, posaçërisht gjatë kohës së krizës ekonomike.
Sashko Jançev, Levica
“Me çfarë qëllimi pronarëve të marketeve, të llojeve të ndryshme të dyqaneve dhe tregtarëve u imponohet obligimi të bëjnë ambalazhe, ngjitëse, deklarata dhe dokumente të tjera në gjuhën shqipe? Dygjuhësia në të gjitha këto ambalazhet, ngjitëse, dokumente është në kundërshtim me kushtetutën, në kundërshtim me dygjuhësinë dhe është jashtë logjikës së shëndoshë ekonomike dhe jashtë çdo lloj logjikeje të shëndoshë. Nuk ka asnjë dobi nga ky obligim, përkundraz dëmton tregtarët, u kushton tregtarëve para dhe kohë pa nevojë”.
Por, ky propozim nuk u mbështet nga asnjë parti tjetër politike. Para seancës, deputeti i VMRO – DPMNE-së njoftoi se, nuk do ta mbështesin asnjë ligj për konsumatorët që nuk ka për qëllim të ndikojë në uljen e çmimeve.
Bojan Stojanovski, VMRO – DPMNE
“Zëdhënësit e LSDM-së dhe Levices le të sigurojnë fillimisht shumicë badenteri për ndryshimin e këtë ligj dhe më pas mundemi të diskutojmë se a do ta mbështes ose jo dikush ligjin. Ne nuk do të mbështesim ligje të cilat nuk garantojnë ulje të çmimeve. Nëse Levica dhe LSDM mendon seriozisht dhe dëshiron t’iu ndihmojë qytetarëve, ja ku e kanë ligjin tonë që ia vlen të diskutohet”.
Sipas ligjit aktual, të gjithë tregtarët dhe kompanitë vendore që importojnë produkte të caktuara, duhet t’u vendosin etiketa edhe në gjuhën shqipe.
