Grupet parlamentare të partive në pushtet kanë dorëzuar interpelancë për punën e anëtarëve të Këshillit Gjyqësor të zgjedhur nga Kuvendi. Sipas pushtetit, një hap i tillë ishte i nevojshëm për të rikthyer besimin në sistemin gjyqësor dhe për të forcuar sundimin e ligjit përmes reformave serioze dhe ndryshimeve rrënjësore. Pushteti kërkoi mbështetjen e të gjitha partive parlamentare opozitare dhe të gjithë deputetëve të tjerë për këto ndryshime.
“Konkretisht, neni 100, paragrafi 8 i Ligjit për Këshillin Gjyqësor parasheh që nëse Kuvendi i Republikës së Maqedonisë nuk e miraton Raportin për punën e Këshillit Gjyqësor dhe ai nuk është miratuar, kjo do të jetë bazë për inicimin e debatit para organeve që i kanë zgjedhur anëtarët e Këshillit Gjyqësor për punën e tyre në Këshill. Kjo flet shumë dhe është vetëm një nga arsyet e shumta se përse ne po paraqesim sot këtë interpelancë. Bashkimi Evropian dhe opinioni në Republikën e Maqedonisë vazhdimisht kanë theksuar mangësi serioze në punën e Këshillit Gjyqësor, veçanërisht në aspektin e pavarësisë, transparencës dhe llogaridhënies.”, – deklaroi Nikolla Micevski nga VMRO-DPMNE.
“Procesi duhet të jetë inkluziv, të ketë konsensus. Ja, që nuk duam ne të kemi të drejtë ekskluzive që t’i bëjmë këto ndryshime. U bëjmë thirrje të gjithë deputetëve në Kuvend, nëse pajtohen se duhet të shkarkohet ky Këshill Gjyqësor që ata e kanë votuar, u bëj thirrje që kur kjo pikë të jetë në rend dite, të votojnë.”, – theksoi kryeministri, Hristijan Mickoski.
“Këshilli Gjyqësor, i cili si organi më i lartë i sistemit të gjyqësisë, që bën zgjedhjen e gjyqtarëve, emërimin dhe shkarkimin e gjyqtarëve, është një organ i cili fatkeqësisht për shoqërinë tonë zhvillon politika ditore të subjekteve të caktuara politike. Ky Këshill Gjyqësor me këta anëtarë nuk ka kredibilitetin e caktuar moral, nuk ka integritetin gjyqësor, që të ushtrojë funksionin e tij të caktuar.”, – theksoi Fatmir Sabriu nga VLEN.
Në Ligjin e ri për Këshillin Gjyqësor që është në përpunim e sipër, pushteti kërkon që shkarkimi i anëtarëve nga ana e Kuvendit të parashihet me ligj. Në thjerrëzën e deputetëve për interpelancë janë pesë anëtarët e Këshillit Gjyqësor e përcaktuar me termin “jurist të shquar”, që janë anëtarët e zgjedhur nga Kuvendi. Aktualisht në Këshill si “jurist të shquar” janë: Vesna Dameva, e cila së fundmi ka dhënë dorëheqje nga pozita e kryetares, Pavlina Cërvenkovski, Selim Ademi, Milazim Mustafa dhe Tanja Çaçarova Ilievska
