Qeveria e Republikës së Maqedonisë së Veriut, me propozim të Ministrisë së Drejtësisë, ka emëruar Denis Preshovën si shef të ri të Delegacionit Kombëtar në GRECO (Grupi i Shteteve kundër Korrupsionit në Këshillin e Evropës), informoi ministri i Drejtësisë, Igor Filkov, përmes një postimi në rrjetet sociale.
Prof. Dr. Denis Preshova është profesor i çrregullt në Fakultetin Juridik “Justiniani i Parë” në kuadër të Universitetit “Shën Kirili dhe Metodi” në Shkup. Ai është autor i shumë punimeve shkencore dhe profesionale në fushën e së drejtës kushtetuese dhe sistemit politik, dhe ka marrë pjesë në një sërë projektesh e aktivitetesh si ekspert për të drejtën kushtetuese.
“Duke marrë parasysh se në kuadër të GRECO-s ka nisur Raundi i Gjashtë i Vlerësimit: ‘Parandalimi i korrupsionit dhe promovimi i integritetit në nivel lokal’, si dhe faktin që është paralajmëruar vlerësim mbi këtë temë për Republikën e Maqedonisë së Veriut, prof. dr. Denis Preshova vjen në momentin e duhur për të udhëhequr delegacionin tonë kombëtar. Njohuritë dhe ekspertiza e tij në fushën e së drejtës kushtetuese dhe sistemit politik do të jenë kyçe për një vlerësim të suksesshëm dhe për mbrojtjen e raporteve të GRECO-s për vendin tonë”, shkroi Filkov në Instagram.
GRECO është një trup monitorues antikorrupsion i Këshillit të Evropës, me seli në Strasburg, Francë. Është themeluar në vitin 1999 si një marrëveshje e pjesshme e zgjeruar mes 17 vendeve anëtare të Këshillit të Evropës. Qëllimi i GRECO-s është forcimi i kapaciteteve të vendeve anëtare për të luftuar korrupsionin, përmes monitorimit të përputhshmërisë së tyre me standardet antikorrupsion të Këshillit të Evropës, nëpërmjet një procesi të vlerësimit të ndërsjellë. GRECO ndihmon në identifikimin e mangësive në politikat kombëtare kundër korrupsionit, me qëllim që të nxiten reformat e nevojshme ligjore, institucionale dhe praktike.
