Drejtoria për mbrojtje dhe shpëtim informon se pas derdhjes së lumit Markova Reka në komunën Studeniçan, është evidentuar dëm material, por nuk ka rrezik për banorët e kësaj zone.
“Një ekip për reagim të shpejtë ka ndërhyrë me pompat për nxjerrje të ujit, dhe të njejtit do të ndërhyjnë sipas nevojës gjatë gjithë ditës. Informacionet e deritanishme tregojnë se situata është nën kontroll dhe nuk ka rrezik për banorët, përveç evidentimit momental të dëmeve materiale”, thonë nga Drejtoria për mbrojtje dhe shpëtim në një postim në Fejsbuk.
Për shkak të reshjeve të shiut, mbrëmë u shkaktua derdhja e lumit Markova Reka afër vendbanimit Lubosh, për të cilin shkak janë përmbytur disa shtëpi, depo dhe objekte industriale në fshatrat Studeniçan, Batincë dhe një pjesë në drejtim të Pintisë.
Nga Qendra për menaxhim me kriza në mëngjes njoftuan se është raportuar për përmbytje në një pjesë të bulevardit “Boris Trajkovski” në vendbanimin Pintia, ku gjithashtu ka pasur raportime për depo të përmbytura.
Gjatë natës, Numri i vetëm i emergjencës 112 ka marrë gjithashtu raportime për shtëpi të përmbytura në Lisiçe të Epërme.
Nga LAMM njoftojnë se është e pakalueshme rruga lokale nga fshati Lisiçe e Epërme drejt Lisiçes së Poshtme në komunën Aerodrom dhe ura e parë në fshatin Batincë.
NQP “Shkup” njofton se për shkak të përmbytjeve të lumit Markova Reka, autobusi me numër 70 qarkullon deri në stacionin filletar/të fundit Drisla dhe autobusi me numër 33 përmes vendbanimit Draçevë në të dy drejtimet.
Hekurudhat e Maqedonisë së Veriut njoftojnë se qarkullimi hekurudhor i udhëtarëve dhe mallrave, nga mbrëmë, nga ora 22:50, është ndërprerë në drejtim të Lisiçës dhe Draçevës dhe anasjelltas, ndërsa qarkullimi i pasagjerëve kryhet përmes stacionit Trubarevë.
