Ministria e Punëve të Brendshme ka njoftuar se kundër dy nëpunësve policorë të shpërndarë në Sektorin për sigurim personal të presidentit të Maqedonisë së Veriut, është ngritur procedurë disiplinore, transmeton TV21.
Ata kanë kanë bërë shkelje të rëndë të rendit të punës dhe disiplinës duke deklaruar rrejshëm se vetura “Porsche” është zyrtare, ndërkaq e njëjta ka qenë private dhe është parkuar në vend të gabuar – në korsi për biçikleta.
Pas revoltës së qytetarëve, për ta tërhequr veturën nga korsia dhe pas rastit të denoncuar në polici, një polic tjetër – i tretë, ka dalë në terren dhe ka konstatuar se vetura nuk është zyrtare dhe e njëjta i është nënshtruar shërbimit “Karrotreci”
“Nëpunësi policor S.N. me veturë speciale “karrotreci” dhe dy të punësuar në NP për Parkingjet Publike në Komunën Qendër, janë drejtuar në vendin e caktuar, ku është takuar vetura dhe grupi i revoltuar i qytetarëve të cilët kanë kërkuar që të tërhiqet vetura. Në vendin e ngjarjes, nga objekti hotelerik kanë dalë dy persona të cilët janë legjitimuar si nëpunës policorë dhe kanë deklaruar se vetura është zyrtare. Nëpunësi policor S.N. i ka urdhëruar menjëherë që ta largojnë veturën dhe ta parkojnë në vendin e duhur, pas çfarë ka hyrë në kabinën e “Karrotreci” me qëllim që të verifikojë nëse vetura është me të vërtetë zyrtare.
Pasi e kanë konfirmuar se vetura nuk është zyrtare dhe se nuk është larguar, të punësuarve nga NP Parkingjet Publike u është dhënë urdhër që ta tërheqin veturën, pas çfarë e njëjta është dërguar në depo. Aty, nga ana e nëpunësit policor H.Gj. është përpiluar procesverbal për kryerjen e kundërvajtjes së trafikut në bazë të nenit 63 të Ligjit për siguri në komunikacion, si dhe gjobë, ku potencohet se kryerësi i kundërvajtjes është S.K.(76) nga Shkupi. Pronar i veturës është M.T.(48) nga Shkupi.
Dy personat të cilët janë paraqitur si nëpunës policorë dhe kanë deklaruar se vetura është zyrtare, me veturë “Ford Mondeo” janë orientuar drejt depos. Nëpunësit policorë kanë kryer verifikim për veturën “Ford Mondeo” dhe kanë konstatuar se të njëjtën e kanë ngasur nëpunësit policorë T.D. dhe I.S. të shpërndarë në Departamentin për siguri personale të Presidentit të RM”, njoftojnë mes tjerash nga MPB-ja.
Është konstatuar se këta policë kanë shkelur rëndë rendin e punës dhe disiplinën dhe ndaj tyre do të ngritët procedurë disiplinore
