Kryetari i komunës së Kërçovës Fatmir Dehari njofton se ka filluar të zbatohet projekti pilot për selektimin e mbeturinave. Edhe pse projekti në fjalë po zbatohet fillimisht vetëm në një lagje të qytetit, Dehari shpreson që ky projekt të zgjerohet në tërë territorin e Komunës së Kërçovës.
Postimi i plotë;
Komuna e Kërçovës nisi pilot projektin për selektimin e mbeturinave – një hap drejt një mjedisi më të pastër dhe të qëndrueshëm në qytetin tonë!
➡️ Komuna e Kërçovës ka bërë një hap të rëndësishëm drejt përmirësimit të menaxhimit të mbeturinave dhe mbrojtjes së mjedisit.
Ditën e djeshme, në njërën prej lagjeve të qytetit, nisi zbatimi i një projekti pilot për selektimin e mbeturinave. Komuna e Kërçovës është një ndër komunat e para në shtet që bën pjesë në këtë nismë që synon të krijojë një model të qëndrueshëm dhe efikas për trajtimin e mbeturinave urbane.
➡️Ky aktivitet është pjesë e projektit “Menaxhimi i qëndrueshëm i mbeturinave në nivel lokal”, i cili ka për qëllim përmirësimin e praktikave për menaxhimin e mbeturinave në komunat dhe ndërmarrjet komunale të rajonit të Pellaqonisë dhe Jugperëndimor, i realizuar në bashkëpunim me Ministrinë e Mjedisit dhe Planifikimit Hapësinor, ndërsa i njëjti mbështetet nga Suedia🇸🇪, shënon një zhvillim të rëndësishëm në përpjekjet për të reduktuar sasinë e mbeturinave që përfundojnë në deponi dhe për të nxitur riciklimin.
➡️Pranimi i këtij modeli pilot është një hap domethënës drejt përmirësimit të cilësisë së jetës së qytetarëve të Kërçovës, me shpresën se projekti do të zgjerohet në tërë territorin e Komunës së Kërçovës.
