Kandidati i sapo shpallur i VLEN për kryetar të komunës së Gostivarit, Sebaudin Dauti, i është përgjigjur ftesës së kandidatit të pavarur, Visar Ademi, për një takim joformal me kafe, ku do të merrte pjesë edhe kandidati i BDI-Taravari, Valbon Limani.
“Faleminderit z. Ademi për ftesën dhe për shprehjen e respektit ndaj garës demokratike. Unë besoj se Gostivari meriton një garë të hapur, të ndershme dhe të barabartë mes të gjithë kandidatëve”, ka deklaruar Dauti.
Ai ka theksuar se, meqë kandidatura e tij u zyrtarizua vetëm një natë më parë, formati më i përshtatshëm për një ballafaqim do të ishte një debat publik me kushte të barabarta për të gjithë.
“Mendoj se formati më i përshtatshëm për një takim të tillë do të ishte një debat publik, i organizuar nga media të pavarura, me moderim profesional, ku të gjithë kandidatët të kemi hapësirë të barabartë për të paraqitur vizionin dhe programin tonë para qytetarëve”, ka shtuar ai.
Dauti ka theksuar gjithashtu se nuk i shmanget asnjë përballjeje. “Unë nuk i shmangem asnjë debati apo ballafaqimi, përkundrazi, i mirëpres të gjitha format ku mund të paraqiten idetë, të dëgjohen mendimet dhe të shkëmbehen vizione për të ardhmen e qytetit tonë. Për mua, çdo ide e mirë që i shërben Gostivarit është e vlefshme, pavarësisht se nga kush vjen”, thotë ai.
Sa për takimin joformal të propozuar nga Ademi, Dauti është shprehur i hapur për ta realizuar në një moment të përshtatshëm: “Sa për një takim joformal për kafe, jam i gatshëm në ditët në vijim. Në këtë mënyrë, do t’i shërbejmë më së miri qytetarëve dhe demokracisë në Gostivar”.
