Korrupsioni mund t’i groposë ambiciet strategjike të Maqedonisë së Veriut dhe demotivon partnerët strategjik në mbështetjen ndaj rrugës Euro-integruese.
Ky vlerësim i Departamentit Amerikan të Shtetit i referohet ndryshimeve të fundit mbi Kodin Penal me të cilat veprat për “shpërdorim të detyrës zyrtare” dhe “bashkëveprimi kriminal” tkurren në masa efektive, ndërsa shpërdorimi i fondeve publike abrogohet si dispozitë.
DASH vlerëson se Maqedonia e Veriut duhet t’i përmbushë kriteret e premtuara në luftën kundër krimit të organizuar.
“Inkurajojmë Maqedoninë e Veriut që t’i përmbushë premtimet e saj për luftën kundër korrupsionit. Liderët e Maqedonisë së Veriut patjetër të tregojnë rezultate të dëshmuar dhe të përforcojnë luftën kundër korrupsionit, pavarësisë institucionale dhe të ndalojnë ndërhyrjen politike posaçërisht në gjyqësor. Kjo është thelbësore për arritjen e qëllimit, anëtarësimit në BE dhe kthimin e besimit të qytetarëve tek pushteti”, thonë nga Departamenti Amerikan i Shtetit.
Administrata e Joe Biden përsërit se mbështetja e tyre në luftën kundër krimit të organizuar mbetet prioritet.
“Lufta kundër korrupsionit në nivel të Ballkanit Perëndimor është prioritet i administratës së Joe Biden. SHBA-të do të vazhdojnë t’i mbështesin Qeveritë, sektorin civil, mediat e pavarura dhe qytetarët në luftën kundër krimit të organizuar, çrrënjosjen e korrupsionit dhe rritjen e transparencës”, thonë tutje nga Departamenti Amerikan i Shtetit.
SHBA-të vlerëson se të gjithë ata që kanë gabuar në raport me ligjin duhet patjetër të përgjigjen para drejtësisë e posaçërisht për veprat që ndërlidhen me krimin e organizuar dhe korrupsionin./ Alsat.mk
