Kryetari i Komunës së Butelit dhe njëherësh kandidat i VMRO-DPMNE-së për kryetar komune, Darko Kostovski, njoftoi nisjen e rikonstruksionit të dy rrugëve kryesore në fshatin Luboten, të cilat nuk janë prekur që nga viti 1998.
“Fjalën e dhënë po e realizojmë. Fillojmë me rikonstruksionin e rrugës kryesore pranë shkollës fillore dhe të një pjese të rrugës numër 3. Kjo është një kërkesë disa-dekadëshe e qytetarëve dhe më në fund po bëhet realitet”, tha Kostovski.
Ai theksoi se gjatë periudhës së kaluar janë asfaltuar disa rrugë në fazën e parë të projektit, ndërsa në ditët në vijim do të vazhdojë rikonstruksioni edhe në pjesë të tjera të fshatit.
“Po përmirësojmë rrjetin rrugor në të gjitha vendbanimet, duke i dhënë prioritet atyre ku deri më tani nuk ka pasur asfalt. Fushata ndërtimore po zhvillohet me dinamikë të fortë dhe synimi është zhvillim i barabartë i të gjitha vendbanimeve”, shtoi ai.
