Sipas shërbimit sekret danez të mbrojtjes, Rusia mund të jetë gati për një luftë të plotë në Evropë brenda pesë viteve nga përfundimi i luftës në Ukrainë.
Agjencia, bazuar në analizën e saj aktuale të kërcënimit, sugjeron se Shtetet e Bashkuara nuk do të marrin pjesë së bashku me vendet e NATO-s në një luftë të tillë.
Ajo deklaroi se e konsideronte të pamundur që Rusia t’i shpallte luftë Ukrainës në të njëjtën kohë me një ose më shumë vende të NATO-s.
Megjithatë, sipas raportit, nëse konflikti në Ukrainë përfundon ose acarohet, Rusia mund të çlirojë burime të mëdha ushtarake dhe potencialisht të sulmojë një vend fqinj brenda gjashtë muajve.
Agjencia nuk sheh ndonjë plan konkret nga ana e Rusisë për një luftë kundër një vendi të NATO-s.
Por, Rusia mund të ketë më shumë gjasa të sulmojë nëse konsideron se aleanca ushtarake perëndimore është dobësuar, për shembull nëse Shtetet e Bashkuara tërhiqnin mbështetjen e tyre.
Shtetet e Evropës Veriore kanë kohë që i frikësohen një kërcënimi nga Rusia.
Shërbimet sekrete të disa vendeve nordike besojnë se një sulm rus përfaqëson kërcënimin më të madh për sigurinë e shteteve të tyre.
Vitin e kaluar, ministri gjerman i Mbrojtjes, Boris Pistorius, kishte dhënë alarmin se Rusia mund të jetë në gjendje të nisë një sulm ushtarak në territorin e NATO-s deri në vitin 2029 dhe kishte kërkuar që ushtria gjermane të jetë gati për luftë sa më shpejt të jetë e mundur.
