Rezultatet e zgjedhjeve sollën një realitet të ri politik në kampusin shqiptar në Maqedoninë e Veriut. Koalicioni VLEN doli fitues i padiskutueshëm në bllokun shqiptar dhe u rendit forca e dytë politike në shtet, duke dëshmuar se legjitimiteti politik dhe besimi i shqiptarëve tashmë janë në anën e saj.
Ky rezultat historik është një sinjal i qartë se shqiptarët kanë votuar për ndryshim, për një qasje të re politike, larg monopolit shumëvjeçar të një partie të vetme. Pas zgjedhjeve, VLEN duhet të përqendrohet në zbatimin e agjendës dhe programit të saj qeverisës, duke mos e kthyer kokën pas. Me këtë mandat të fuqishëm, ajo ka mundësinë të veprojë pa trysni, pa frikë dhe me vizion të qartë për rivendosjen e vijave të kuqe në funksionimin e qeverisë dhe mbrojtjen e interesave kombëtare.
Në anën tjetër, AKI – bashkimi i BDI-së me Aleancën e Selës dhe Taravarit – përjetoi një
disfatë të thellë. Pavarësisht se vetë e shpallën këtë proces si “referendum për shqiptarët”,
rezultati i tregoi të kundërtën: shqiptarët zgjodhën ndryshimin, jo status quo-në.
Kjo humbje e rëndë pritet të pasohet nga krizë e brendshme në të dyja kampet: tek Aleanca që humbi peshën e saj politike, dhe veçanërisht tek BDI, ku pas më shumë se 23 vitesh pushtet, froni i liderit është lëkundur seriozisht. Kriza e udhëheqjes dhe humbja e terrenit politik do ta detyrojë këtë subjekt të përballet me ristrukturim të thellë ose shpërbërje graduale.
Për VLEN-in, ky është moment historik – një mundësi e artë për të konsoliduar forcat politike shqiptare në një subjekt të vetëm, të qëndrueshëm dhe pa ndasi bajraktarësh. Një bashkim i tillë do të dëshmonte se nuk ekziston luftë për bajraktarizëm, por ekziston vullneti për bashkim rreth interesit kombëtar dhe qytetar. Kjo do të ishte një lëvizje e fuqishme për ta bindur popullin se interesi i tyre është interesi i përbashkët kombëtar, duke forcuar kështu besimin në politikën e re që përfaqëson VLEN.
Nëse ky momentum shfrytëzohet me mençuri dhe me vizion të qartë politik, VLEN ka
potencialin të bëhet forca udhëheqëse e së ardhmes politike shqiptare në Maqedoninë e
Veriut. Ky do të ishte hapi që e kthen suksesin zgjedhor në projekt afatgjatë kombëtar, duke e pozicionuar VLEN-in si faktor stabiliteti, përfaqësimi dhe zhvillimi për shqiptarët në vend.
Ferdi Baftija, Historian
