Vendimi i Gjykatës së Lartë për të mbështetur një ligj federal që kërkon ndalimin e TikTok në SHBA, përveçse nëse aplikacioni gjendet nën pronësi jo-kineze deri të dielën, ka shkaktuar pasiguri mes përdoruesve. Megjithatë, Shtëpia e Bardhë deklaron se zbatimi i këtij ligji do të bjerë mbi administratën e ardhshme, e cila nis punën të hënën. Presidenti i zgjedhur, Donald Trump, po shqyrton mundësinë e nxjerrjes së një urdhëri ekzekutiv për të shtyrë zbatimin e këtij ligji, raportoi “The Washington Post.”
Çfarë mund të ndodhë me TikTok-un?
Ka disa mundësi: ndalimi mund të shmanget, të jetë i përkohshëm ose të zgjasë për një periudhë të gjatë. Megjithëse është e vështirë të parashikohet rezultati, përdoruesit mund të përgatiten për të gjithë skenarët e mundshëm.
Në një deklaratë të premten mbrëma, TikTok tha se aplikacioni “do të jetë i detyruar të fiket më 19 janar,” përveçse nëse administrata e re të japë garanci specifike që nuk do ta zbatojë ligjin.
A mund të përdoret TikTok përmes faqes në internetit?
Edhe nëse TikTok nuk është më i disponueshëm si aplikacion, qasja përmes faqes së internetit të tij nuk është e sigurt. Ligji i ri kërkon që ofruesit e shërbimeve kompjuterike të ndalojnë mbështetjen e TikTok në SHBA, duke e bërë të pasigurt nëse përmbajtjet e zakonshme të TikTok do të jenë të disponueshme.
A mund të ndihmojë një VPN?
Një opsion i mundshëm për të vazhduar përdorimin e TikTok është përmes një rrjeti privat virtual (VPN). Ky softuer mund të bëjë që të duket sikur po e përdorni TikTok nga një vend ku ai nuk është i ndaluar. Megjithatë, përdorimi i VPN-ve ka rreziqet e veta, pasi disa prej tyre mund të jenë të pasigurta dhe të dëmshme për të dhënat personale.
A do të përballen përdoruesit me pasoja ligjore?
Jo. Ligji nuk kërkon nga amerikanët të ndalojnë përdorimin e TikTok ose ta fshijnë atë nga telefonat e tyre. Vetëm kompanitë, si Apple dhe Google, mund të përballen me gjoba të mëdha për shkeljen e ligjit.
Si të ruani videot tuaja ose të të tjerëve?
Duke pasur parasysh pasigurinë mbi të ardhmen e TikTok, është mirë të shkarkoni të dhënat tuaja. Ju mund ta bëni këtë duke shkuar në: Profile > Settings and privacy > Account > Download your data.
Ndërkohë, për të ruajtur videot, mund të përdorni opsione të palëve të treta, si shtesa të shfletuesve, për t’i shkarkuar ato në pajisjet tuaja. Por kini kujdes, pasi këto mjete mund të rrezikojnë privatësinë tuaj.
Çfarë alternative ka?
Alternativa të mundshme janë Instagram Reels, YouTube Shorts, ose aplikacione të tjera si Lemon8 dhe RedNote. Nëse dëshironi të ndiqni krijuesit tuaj të preferuar, sigurohuni që të gjeni llogaritë e tyre në platforma të tjera.
A do të ndalojë Donald Trump këtë vendim?
Nuk është e qartë. Me ardhjen në detyrë të Trump-it të hënën, ai mund të vendosë për shtyrjen e zbatimit të ligjit. Ndërkohë, TikTok po kërkon dialog me administratën e re për të siguruar vazhdimësinë e shërbimit në SHBA.
Ndërkohë që pritet një vendim përfundimtar, përdoruesit e TikTok mund të marrin masa paraprake për të ruajtur videot dhe të dhënat e tyre, duke u përgatitur për të gjitha skenarët e mundshëm.
