Komuna e Çairit dhe komuna e Tetovës zyrtarisht janë anëtare me të drejta të plota të organizatës prestigjioze ndërkombëtare Sister Cities International në Washington DC. Këtë e ka bërë të ditur kryetari komunës së Çairit Visar Ganiu.
Postimi i plotë:
📍 Nga Washington D.C. – Kam kënaqësinë t’ju informoj se sot, në selinë qendrore të organizatës “Sister Cities International”, u formalizua anëtarësimi i Komunës së Çairit dhe Komunës së Tetovës në këtë rrjet prestigjioz ndërkombëtar të diplomacisë qytetare.
Kjo marrëveshje, e nënshkruar në kuadër të vizitës zyrtare që po zhvilloj në Shtetet e Bashkuara të Amerikës, shënon një moment të rëndësishëm për rolin ndërkombëtar të komunës sonë dhe për mundësitë e reja që hapen në fushat e bashkëpunimit ndërkomunal.
Përmes këtij anëtarësimi, Komuna e Çairit do të përfitojë:
🔹 Partneritete të qëndrueshme me pushtete lokale nga vende të ndryshme;
🔹 Përfshirjen e të rinjve dhe institucioneve arsimore në programe ndërkombëtare shkëmbimi;
🔹 Promovimin e kulturës, turizmit dhe zhvillimit ekonomik;
🔹 Qasje në trajnime, burime dhe mbështetje institucionale;
🔹 Afirmim të rolit të komunës sonë në dialogun dhe bashkëpunimin ndërkombëtar.
Ky zhvillim është një hap i rëndësishëm drejt ndërlidhjes më të thellë me rrjete globale dhe afirmimit të Komunës së Çairit si një partner aktiv në proceset bashkëkohore të diplomacisë lokale.
