Ndërtimi nuk është vetëm tulla, beton dhe çelik, por një sektor që krijon një numër të madh mundësish ekonomike, tha zëvendëskryeministri i Qeverisë së Republikës së Maqedonisë së Veriut, përgjegjës për çështje ekonomike, koordinim me resorët ekonomikë dhe investimet, Fatmir Bytyqi në Konferencën e Parë të Infrastrukturës Rrugore “Përvojat, Sfidat dhe Perspektivat”, që mbahet në Ohër.
Në Konferencë, zëvendëskryeministri Bytyqi ishte pjesë e panelit të dytë me temën “Roli që ka ndërtimi në zhvillimin ekonomik të vendit”, ku tha se ky sektor i ekonomisë nuk lidhet vetëm me ekonominë, por për zhvillimin e përgjithshëm të vendit.
“Unë nuk e shoh ndërtimin si një sektor të veçantë, të ndarë, por aq më tepër, 25 degë janë nga ky sektor ose të lidhura me të, të cilat drejtpërdrejt ose tërthorazi kanë një rol në zhvillim. Por është e rëndësishme, cila është vlera e shtuar që po i vendosim vetes”, tha zëvendëskryeministri Bytyqi.
Ai theksoi se nuk mund të flitet për decentralizim pa investuar në infrastrukturë dhe reduktimin e pabarazisë ndërmjet rajoneve.
“Mosinvestimi në infrastrukturën rrugore është një nga arsyet thelbësore që shkakton zhvillim joadekuat dhe të pabarabartë”, tha zëvendëskryeministri Bytyqi, ndërsa theksoi se ndërtimi duhet parë edhe nga prizmi se cila degë e tij sjell vlerën më të madhe të shtuar.
Duke folur për fuqinë punëtore dhe gatishmërinë e saj për ndërtim, zëvendëskryeministri Bytyqi vuri në dukje se duhet të përgjigjemi se sa persona në pesë vitet e ardhshme do të jenë në gjendje t’u përgjigjen nevojave të ndërtimit, ndërsa vuri në dukje procesin e krijimit të Strategjisë Kombëtare për Zhvillim (SKZH).
“Zhvillimin e SKZH-së e kemi nisur dy vite më parë, në mënyrë gjithëpërfshirëse dhe me konsensus mes të gjithë faktorëve, tashmë jemi në përfundim të miratimit të tij, presim që Kuvendi ta votojë deri në fund të vitit. Qëllimet kryesore dhe vizioni se çfarë lloj vendi duam të kemi në 20 vitet e ardhshme do të përcaktohen në SKZH. SKZH është një mjet për të arritur qëllime më të larta, për zhvillimin ekonomik në sektorët që duhet të çojnë përpara zhvillimin, në të cilin çdo kompani ndërtimi do të marrë vendin ku i takon”, tha zëvendëskryeministri Bytyqi.
Zëvendëskryeministri Bytyqi në fjalimin e tij theksoi nevojën për krijimin e kushteve që do t’i bëjnë kompanitë e ndërtimit konkurruese në tregjet e huaja.
“Së bashku duhet të krijojmë kushte të mjaftueshme që të gjithë ju të jeni konkurrues në tregun e ndërtimit, pavarësisht nëse është në Maqedoninë e Veriut apo jashtë. Vetëm rritja e konkurrueshmërisë është një zgjidhje e qëndrueshme për kompanitë. Çdo kriter tjetër, që ka kushte të privilegjuara, mund të jetë diskriminues”, tha zëvendëskryeministri Bytyqi, ndërsa bëri të ditur se rritja e konkurrueshmërisë do të thotë gatishmëri më e madhe e kompanive të ndërtimit për tregun e brendshëm të Bashkimit Evropian.
Zëvendëskryeministri Bytyqi theksoi se reformat në arsim duhet t’u përgjigjen nevojave të 20 viteve të ardhshme, për të nxitur kapitalin njerëzor aty ku ka vlerën më të madhe të shtuar, siç është ndërtimi.
Së bashku me zëvendëskryeministrin Bytyqi, pjesë e panelit ishin edhe ministri i ekonomisë, Kreshnik Bekteshi, Prof. Dr Jelisaveta Georgieva Jovevska, dhe Prof. Dr Jasmina Bunevska Talevska. Konferenca, e cila mbahet sot dhe nesër në Ohër, organizohet nga Shoqata për ndërtimtari, industri të materialeve ndërtimore dhe jometaleve pranë Odës Ekonomike të Maqedonisë së Veriut, në bashkëpunim me Ministrinë e Transportit dhe Lidhjeve dhe NP Rrugët Shtetërore.
