Zëvendëskryeministri për çështje ekonomike, Fatmir Bytyqi, në Manastir ka vizituar kompaninë “Brainchild” e specializuar në prodhimin e pajisjeve sportive të destinuara për surfim në sipërfaqe ujore dhe për fluturimit të lirë me vela.
Zëvendëskryeministri Bytyqi, theksoi se “Brainchild” është një kompani e re, progresive dhe ambicioze që planifikon zhvillimin e saj në Maqedoninë e Veriut, që konfirmon se kemi një mjedis ekonomik tërheqës dhe stimulues në vend.
“Brainchild” nga ky vit po planifikon ngritjen e dy kompanive të reja, njëra në fushën e prodhimit dhe tjetra e fokusuar në aktivitetet kërkimore-zhvilluese, me një vlerë totale prej 13.5 milionë euro. Vlera e investimit të planifikuar në prodhim është 11.5 milionë euro dhe në pesë vitet e ardhshme do të hapen 275 vende të reja pune me synimin e parashikuar për 10 vjet të realizohen gjithsej 530 vende pune. Në pjesën e kërkim dhe zhvillimit “Brainchild”, planifikon investim prej 2 milion euro dhe krijimin e 35 vende të reja pune.”, – deklaroi zëvendëskryeministri për çështje ekonomike, Fatmir Bytyqi.
“Si qytetar gjerman vendosa të investoj në Maqedoninë e Veriut, sepse Maqedonia është në zemër të Evropës. Unë kam investuar më parë në Ukrainë, Azi dhe Kinë. Laboratori ynë i sapokrijuar me seli në Manastir do të aplikojë standarde të reja dhe do të ketë vende të reja pune.”, – theksoi menaxheri i kompanisë “Brainchild”, Ralf Hening Grosel.
Në konferencën për media në Manastir, u bë e ditur se aktualisht në Maqedoninë e Veriut ka një portofol prej mbi 600 kompanish që kanë marrë ndihmë shtetërore, prej të cilave 98 për qind janë vendore dhe vetëm 2 për qind janë kompani të huaja.
