Buxheti i Kosovës rritet me 9 %, fokusi tek infrastruktura, shëndetësia dhe mbrojtja

Kuvendi i Kosovës diskutoi këtë të hënë projektbuxhetin e vitit të ardhshëm. Buxheti  i vitit 2025 kap vlerën e 3.6 miliardë eurove, 9% më i lartë se ai i këtij viti.

Gjatë prezantimit kryeministri Albin Kurti  tha se ky buxhet është për familjen, ndërsa përmendi mbështetjen për gratë, fëmijët, studentët dhe rritjen e pagave në sektorin publik.

“Buxheti për paga dhe shtesa 13.5 për qind më i lartë se në vitin 2024 ose 111.5 milionë euro. Buxheti për mallra dhe shërbime duke përfshirë edhe shërbimet komunale është 3.2 për qind më i lartë sesa në vitin 2024, buxheti për subvencione dhe transfere është 8.75 për qind më i lartë sesa në vitin 2024. Rol këtu ka masat e reja, si pensionet, shtesat për fëmijë, rimëkëmbja ekonomike dhe të tjera. Buxheti për investime kapitale është 8.3 për qind më i lartë sesa në vitin 2024”, tha Kurti.

Rritje të buxhetit, vitin e ardhshëm, do të kenë edhe disa nga institucionet qendrore të shtetit, përfshirë ato në sektorin e mbrojtjes, sigurisë, shëndetësisë dhe infrastrukturës rrugore.

Mes tjerash, të dhënat tregojnë se buxheti i Ministrisë së Financave do të jetë më i larti, i Ministrisë së Mbrojtjes do të rritet me më shumë se 54 milionë euro krahasuar me këtë vit, ndërsa i Ministrisë së Infrastrukturës për rreth 47 milionë.

Në Projektbuxhetin për vitin 2025 thuhet se gjatë vitit aktual ekonomia e Kosovës pritet të rritet për 4.5 për qind. Kontributi kryesor në rritjen ekonomike vitin e ardhshëm pritet të vijë nga investimet private dhe publike, por edhe nga eksportet e mallrave dhe shërbimeve.

Next Post

Kryetari i Bashkimit Demokratik për Integrim, z. Ali Ahmeti, bashkë me bashkëpunëtorë mori pjesë në Mbledhjen me Popullin të organizuar nga dega në Cashkë. Kryetari Ahmeti theksoi se mbledhjet dhe takimet e këtilla të degëve do të jenë pjesë e statutit tonë dhe do të vazhdojnë të jenë forumet ku të gjithë mbështetësit dhe përkrahësit tanë do të kenë mundësinë të kontribuojnë dhe të kenë një zë të fuqishëm. Kryetari Ahmeti nënvizoi se Republika e Maqedonisë së Veriut është një vend i vogël, dhe mund të njihemi të gjithë kokë më kokë. Është shqetësuese kur dëgjojmë debatet e intelektualëve dhe opinionistëve maqedonas që pyesin përse shqiptarët kanë ndryshuar statusin e tyre politik dhe social, përse kanë arritur përfaqësimin në të gjitha institucionet, përse po angazhohen për barazi. Po, ne kemi bërë përpjekje për t’i arritur ato që i kërkuam për breza me mund e sakrifica. Ne nuk kërkuam më shumë, por vetëm të jemi të barabartë me të gjithë qytetarët e këtij vendi. Lideri i BDI-së para të pranishmëve theksoi se Maqedonia e Veriut nuk është shtet vetëm i një bashkësie etnike, por është shtet i të gjithë qytetarëve të saj. Të gjithë duhet të ndihen si në shtëpinë e tyre, dhe asnjë qytetar nuk duhet të ndihet si qiraxhi. Kjo është një e drejtë që nuk mund ta mohojmë. Ali Ahmeti bëri të ditur se ky shtet është edhe i shqiptarëve, por jo i shqiptarëve që duan të mbeten të nënshtruar, pa gjuhë, pa flamur, si barinj. Kjo periudhë ka kaluar! Ne do të vazhdojmë të angazhohemj për barazi të plotë, për të drejtat tona dhe për një të ardhme më të mirë për çdo qytetar. Gjithashtu, kreu i BDI-së tha se Marreveshja e Paqes e Ohrit mbetet një dokument i rëndësishëm dhe garanci për stabilitetin dhe përfaqësimin e shqiptarëve në dhe të gjitha komuniteteve në shtet. Ajo është e garantuar nga aleatët tanë ndërkombëtarë, dhe çdo tentativë për ta rinegociuar atë është e papranueshme. Ali Ahmeti përsëriti se Ligji për përdorimin e gjuhës shqipe është arritur me shumë mund e gjak, dhe ajo që është arritur me gjak nuk mund të shkatërrohet kollaj. Ne duhet të veprojmë si një trup i vetëm, për të ruajtur këtë arritje të madhe dhe për të ecur përpara, për anëtarësimin në Bashkimin Evropian dhe zhvillimin e vendit tonë. Maqedonia e Veriut ka nevojë për zhvillim, prosperitet dhe marrëdhënie të mira ndërfqinjësore. Bashkëpunimi dhe respekti reciprok midis të gjitha grupeve etnike janë thelbësorë për të ardhmen e vendit tonë. Ali Ahmeti në fund tha se ne nuk duam argatë, por funksionarë që punojnë për të gjithë qytetarët. Qeverisja e vërtetë është ajo që është e angazhuar për mirëqenien e të gjithë qytetarëve, pa dallim etnik