Të gjithë tekstet shkollore për nxënësit deri në klasën e shtatë do të digjitalizohen në ditën e parë të shkollës dhe do të jenë të disponueshme në “çantën dixhitale”, tha të mërkurën kryeministri Nikolay Denkov gjatë një konference në Këshillin e Ministrave mbi masat që qeveria po merr për fillimin e vitit akademik nw Bullgari. Disa shtëpi botuese kanë shtuar tashmë mjete mësimore të realitetit virtual, tha kryeministri.
Denkov tha se përveç shënimeve mjekësore digjitale, të cilat do të hyjnë në fuqi më 1 tetor dhe që kërkohen në rast të mungesës nga shkolla për shkak të sëmundjes, janë duke u zhvilluar edhe disa aktivitete të tjera digjitalizimi.
Denkov kujtoi se Ministria e Punës dhe Politikës Sociale ofron ndihmë për të gjithë nxënësit në klasën e parë, të dytë, të tretë, të katërt dhe të tetë. Ai shtoi: “Janë rreth 166,000 fëmijë. Këto ndihma janë 300 BGN secila dhe ndahen në dy pjesë – në fillim të semestrit të parë, dhe nëse fëmijët ndjekin mësimet gjatë atij semestri, gjysma e dytë do të paguhet në tremujorin e dytë. Kjo është një nga masat e shumta me të cilat po përpiqemi t’i tërheqim fëmijët në shkollë, por edhe të krijojmë stimuj për t’i mbajtur ata atje”.
Kryeministri raportoi se Ministria e Brendshme po kryen fushatën e saj më të fundit kushtuar sigurisë rrugore për fëmijët. Në kuadër të fushatës, tashmë janë kontrolluar afro 600 autobusë shkollorë dhe janë lëshuar rreth 200 njoftime për probleme të vogla teknike. Nuk janë identifikuar mangësi serioze.
Denkov tha se po kryheshin kontrolle për t’u siguruar që ushqimi i shkollës është në përputhje me standardin.
Ministri i Arsimit dhe Shkencës Galin Tzokov njoftoi se diskutimet do të vazhdojnë deri në fund të shtatorit për ndryshimet e kurrikulës./BTA-KosovaPress/
