Dallimi mes meje dhe kundërkandidatit tim në këto zgjedhje është çështja e korrupsionit. Kështu theksoi kandidati për kryetar të Komunës së Çairit, Bujar Osmani, gjatë debatit televiziv me kundërkandidatin e tij për Çair, Izet Mexhiti.
“Nëse unë kam ndonjë kapital profesional e politik, ai është integriteti. Prej njëzet vitesh jam kirurg, askush asnjëherë nuk ka paraqitur ankesë kundër meje për korrupsion, madje as në Qeveri, sikur të kisha bërë vetëm një pikë gabim, askush nuk do të ma falte. Por pikërisht ky është kapitali me të cilin po hyj,” tha Osmani.
Osmani kujtoi se për shkak të mënyrës së punës së udhëheqjes aktuale të Çairit, besimi i qytetarëve është humbur prej kohësh.
“Në vitin 2016, BDI doli si partia e tretë, na mundën si LSDM-ja, ashtu edhe Besa. Prandaj në vitin 2017 bëmë ndryshim dhe besoja se me kryetarin e ri do të ndodhte një ndryshim i vërtetë. Por, për fat të keq, u vazhdua me të njëjtën politikë. Sot e fshehin kryetarin, i cili e kaloi tërë mandatin pa rezultate,” tha Osmani për Visar Ganiun.
Ai publikisht mori përgjegjësinë për besimin që kishte dhënë në të kaluarën.
“Nëse kam ndonjë ndjenjë ndërgjegjeje në këtë fushatë, ajo është sepse unë kërkova besim për kryetarin aktual, duke besuar se do të sillte ndryshim. Sot hyra vetë, jo për të zëvendësuar një njeri me një tjetër, por për të ndryshuar kulturën e qeverisjes në Çair,” theksoi Osmani.
Ai nënvizoi se qytetarët nuk duan vazhdimësi pas 20 vitesh dhe se Çairit i duhet një lider që punon me ndershmëri, përkushtim dhe pa kalkulime.
“Qytetarët nuk i interesojnë partitë, atyre u duhet një njeri që çohet në pesë të mëngjesit dhe punon me popullin, një njeri që mund ta akuzosh për gjithçka, por jo për korrupsion,” deklaroi Osmani.
Osmani kujtoi se tashmë e ka mbështetjen e qytetarëve. “Vetëm vitin e kaluar isha kandidat për president të shtetit dhe fitova në Çair. Aty mora mesazhin se qytetarët më mbështesin, sepse besojnë se ajo që kam bërë deri tani, mund ta bëj edhe në Çair,” përfundoi Osmani.
