Pas përfundimit të zgjedhjeve lokale, kandidati i Aleancës Kombëtare për Integrim (AKI) për Komunën e Sarajit, Blerant Ramadani, ka reaguar me një mesazh falënderimi dhe reflektimi për qytetarët, duke theksuar se për të dhe ekipin e tij beteja për idealet sapo ka hyrë në një fazë të re informon Tetovasot.
Në reagimin e tij publik, Ramadani ka uruar kundërkandidatin për rezultatin dhe i ka dëshiruar sukses në shërbim të komunës, duke theksuar se “mbi çdo fitore numerike qëndron një fitore më e madhe — ajo e ndërgjegjes, e besës dhe e qëndrimit për të vërtetën”.
“Ne e dinim se kjo nuk ishte vetëm një garë politike, por një sprovë karakteresh, që do të tregonte kush qëndron për parime dhe kush i shet ato për interesa të çastit,” – ka shkruar Ramadani, duke krahasuar situatën me Betejën e Hendekut të përmendur në Kuran, si simbol të qëndrueshmërisë dhe besimit.
Ai shton se sfidat politike nuk e kanë rrëzuar ekipin e tij, por e kanë forcuar, duke e cilësuar këtë periudhë si “moment pastrimi nga ata që nuk i përkasin rrugës së vërtetë”.
