Në Bruksel u zhvillua sot një tjetër raund i negociatave ndërmjet Kosovës dhe Serbisë, me fokus kryesor krijimin e Komisionit të përbashkët për personat e zhdukur me forcë. Megjithatë, takimi nuk prodhoi rezultat konkret.
Sipas kryenegociatorit, Besnik Bislimi pala serbe është tërhequr nga marrëveshja për termat e referencës dhe refuzoi të diskutojë propozimet e Kosovës për marrëveshjen bazike.
‘‘Ideja sot ishte që të kemi progres në themelimin e komisionit të përbashkët për personat e zhdukur me forcë. Dhe pastaj në pjesën tjetër të kemi një takim kur Kosova dhe Serbia japin propozime konkrete sipas të cilave pastaj versioni 10 i planit të senkuencimit do të mund të bëhej si një plan i pranueshëm për palët’’, u shpreh ai.
ADVERTISING
Ai ka shtuar se themelimi i këtij komisioni s’u arrit, duke thënë se ‘‘me gjasë Serbia është tërhequr nga marrëveshja për termat e referencës’’.
‘‘Në pikën e parë fatkeqësisht nuk arritëm të kryejmë misionin tonë, pra themelimin e Komisionit, për arsye se me gjasë Serbia është tërhequr nga marrëveshja për termat e referencës, duke thënë se ata duan të ndërhyjnë edhe njëherë në dokument gjë që nuk është pranuar as nga Brukseli as nga pala jonë’’, tha Bislimi.
Kryenegoaciatori ka deklaruar edhe se Serbia, siç ka thënë ai, është tërhequr nga marrëveshja bazike ose refuzon të diskuton marrëveshjen bazike.
‘‘Ndërkaq te pjesa e dytë, Kosova dha tri propozimet e veta këto propozime kishin të bëjnë që neni 1 deri në 4 të jenë të përfshira të marrëveshjes bazike. Ndërkohë Serbia ka refuzuar të jap propozime konkrete. Pozicionoi i Serbisë mund të përkthehet si shumë thjeshtë, së pari Asociacioni, pra parakusht e pastaj vijat e kuqe të Serbisë që nënkupton që në fakt Serbia është tërhequr nga marrëveshja bazike ose refuzon të diskuton marrëveshjen bazike’’, deklaroi Bislimi.
