Kryetari i Komunës së Tetovës, Bilall Kasami, mirëpriti në një takim zyrtar shefen e Sektorit për Shqipërinë dhe Maqedoninë e Veriut në Drejtorinë e Zgjerimit të Komisionit Evropian, znj. Sigrid Brettel. Takimi u fokusua në ndikimin pozitiv të projektit të Rrugës së Butiqeve, i cili tashmë ka sjellë përmirësime të ndjeshme në jetën e përditshme të banorëve dhe zhvillimin e bizneseve në zonë.
Kasami theksoi rëndësinë e bashkëpunimit me Delegacionin Evropian, duke e cilësuar atë si një dëshmi të qartë të përkushtimit institucional për përmirësimin e infrastrukturës urbane.
“Ky projekt është një hap i rëndësishëm drejt krijimit të një mjedisi më të mirë për qytetarët tanë. Mbështetja e vazhdueshme nga Bashkimi Evropian është thelbësore për avancimin e Tetovës drejt standardeve evropiane,” u shpreh Kasami.
Takimi u vlerësua si një hap i mëtejshëm drejt thellimit të bashkëpunimit për projekte të reja zhvillimore në të ardhmen, me qëllim krijimin e një qyteti më modern dhe të qëndrueshëm për të gjithë qytetarët.
