Presidenti i SHBA, Joe Biden po shqyrton nëse do të sigurojë status të veçantë “imuniteti” për bashkëpunëtorët dhe aleatët e tij, për të cilin Shtëpia e Bardhë ka frikë se mund të shënjestrohen në mënyrë të padrejtë nga administrata e Presidentit të ardhshëm Donald Trump.
Ky është një veprim paraprak që do të përbënte një përdorim të ri dhe të diskutueshëm të pushtetit të jashtëzakonshëm kushtetues të presidentit për të falur.
Konsultimet e deritanishme kanë qenë kryesisht në nivelin e avokatëve të Shtëpisë së Bardhë. Por vetë Biden e ka diskutuar këtë çështje me ndihmës të lartë, sipas dy personave të njohur me këtë çështje, të cilët folën në kushte anonimiteti të enjten për AP.
Asnjë vendim nuk është marrë, thanë ata, dhe është e mundur që Biden të zgjedhë të mos bëjë asgjë.
Faljet kanë qenë historikisht për ata të akuzuar për krime specifike, dhe zakonisht ata që tashmë janë dënuar për një krim, por stafi i Biden po mendon ta japë atë edhe për njerëzit që nuk janë hetuar.
Ata kanë frikë se Trump dhe aleatët e tij, të cilët kanë premtuar “hakmarrje”, mund të nisin hetime që do të kishin kosto reputacioni dhe financiar për objektivat e tyre, edhe nëse ato nuk rezultojnë në ndjekje penale.
Ky diskutim vjen në vazhdën e polemikave rreth faljes nga Biden të djalit të tij Hunter, i cili përballej me akuza si armëmbajtje pa leje dhe evazion fiskal.
