Rriten çmimet e produkteve ushqimore dhe standardit jetësor, por njëkohësisht rriten edhe pagat, ndërsa inflacioni është duke u ulur. Kështu u shpreh ministri i Financave, Fatmir Besimi, pas përfundimit të “Erste Investors Breakfast”, i organizuar nga “Sparkase Bank”. Ai shprehet i vetëdijshëm se vendi dhe qytetarët tanë po kalojnë përmes një periudhe të vështirë të krizave dhe të goditjeve të shumta ekonomike, por ajo që është më e rëndësishme, sipas tij, është që njëkohësisht kemi rritje të qëndrueshme të pagave, e cila ndikon po ashtu edhe në uljen e inflacionit, tha Besimi.
“Në këtë periudhë tashmë po ulim çmimet, respektivisht po ulim inflacionin. Po japim një mesazh të qartë për uljen e deficitit buxhetor, punojmë në ruajtjen nivelit të qëndrueshëm të borxhit publik, duke mbështetur njëkohësisht edhe investimet dhe duke zbatuar masat antikrizë. Ne, edhe sot subvencionojmë çmimin e energjisë elektrike dhe zbatojmë shumë programe të tjera për të mbështetur ekonominë për t’i zbutur efektet negative ndaj qytetarëve. Maqedonia ka qenë më e prekura nga çmimet në tregun evropian dhe gjatë kësaj periudhe ne e kemi zbutur efektin negativ dhe do të vazhdojmë ta bëjmë këtë.”, – deklaroi ministri i Financave, Fatmir Besimi.
Sfidat ekonomike do të vazhdojnë edhe më tej, vlerëson Besimi, duke shtuar se lëvizjet e reja gjeopolitike në botë, do të mund të ndikojnë shtesë në ekonominë e vendit. Andaj Besimi apelon se duhet të mësohemi me të jetuarit në kohë të krizave dhe pasigurive dhe punojmë fuqishëm në përpilimin dhe zbatimin e politikave për rritje të qëndrueshme.
“Nga muaji prill ka rritje reale të pagave. Qytetarët e ndjejnë efektin e goditjeve, por kjo është arritur me një përgjigje që ofron një bazë solide për të pasur rritje e qëndrueshme në afat të mesëm, ndërsa sa i përket krizave, e thash edhe para një jave sfidat vazhdojnë, askush nuk mund të tregojë se ato do të mbarojnë. Lufta në Ukrainë vazhdon, në ndërkohë po hapen konflikte të reja që me siguri do të shkaktojnë efekte ekonomike, pra në nivel global kemi lëvizje të reja të cilat do të ndikojnë në treg.”, – theksoi ministri i Financave, Fatmir Besimi.
Sipas Besimit, buxheti mbetet në të njëjtin nivel për sa i përket rritjes dhe deficitit. Këto janë projeksione planifikuese që do të ofrojnë një realizim më të mirë të planeve për strategjinë fiskale.
