Bekim Sali: Jam personi më i apolitizuar në skenën politike

Deputeti i Alternativës dhe Koalicionit VLEN, Bekim Sali, ka folur për
jetën e tij në një intervistë për emisionin SummerPastel në TV21.
Sali ka folur për pikëpamjet e tij mbi politikën dhe kyçje në politikë.
Sali ka sqaruar se ndoshta është personi më i apolitizuar në skenën
politike.
“ Unë, në takime të përditshme, me miq, me dashamir, me njerëz të cilët
i njoftoj, shpesh e them ndoshta jam personi më i apolitizuar në skenën
politike. Edhe pse i përkas një partie politike, një koalicioni të
sotëm, një shumice e cila po qeverisë me qeveri aktuale në vendin tonë.
Ende e konsideroj veten se nuk jam i politizuar aq shumë. Edhe pse kanë
kaluar njëmbëdhjetë vite që jam aktiv në politikë. Deri në momentin e
vendimit për t`u marr me politikë unë kam pasur një aversion për
politikën, jo për politikanët. Për arsye se është shumë e vështirë të
mbetesh vetvetja. Aty ku duhet çdo ditë të bëni nga dy tre kompromise
për të gjetur gjuhë të përbashkët, qoftë ajo për një vendim, për një
ligj, për një koalicion, për një bashkëpunim, për të ftuar miq që të
kyçen në politikë dhe të kontribuojnë në përmirësimin e gjendjes së
përgjithshme për banorët e këtij vendi. Duhet të gjeni kompromise në
vazhdimësi. Nuk mund të ndaleni. Dhe e kam pasur një bindje se këto
persona të cilët bëjnë shumë kompromise, pas një kohe e humbin
identitetin e tyre dhe nuk janë më vetvetja. Prandaj shpesh për
politikanët thuhet në opinion ka qenë kështu, sot është kështu. Edhe kjo
ka qenë një sfidë për mua. E mendoja a mund të futesh në politikë, të
bësh kompromise shumë dhe të mbetesh vetvetja. Mos të ndryshosh nga
vlerat e tua, nga identiteti yt, nga pikëpamja që të tjerët e kanë ndaj
teje. Atë vlerësim e japin të tjerët”, ka thënë Sali.