Bashkimi Europian u ka bërë thirrje të gjitha partive politike të përfaqësuara në Kuvendin e Kosovës që të respektojnë vendimin e fundit të Gjykatës Kushtetuese lidhur me themelimin e Kuvendit të ri dhe të gjejnë kompromisin e nevojshëm për të përparuar me procesin e zgjedhjes së kryetarit dhe zëvendëskryetarëve të organit ligjvënës.
Në një deklaratë të publikuar në faqen zyrtare të delegacionit në Kosovë, Bashkimi Evropian theksoi se “Gjykata Kushtetuese ka folur dhe ka dhënë sqarime të rëndësishme” dhe se nuk ka më kohë për të humbur në një ngërç politik që po pengon funksionimin normal të Kuvendit dhe institucionet e Kosovës.
“BE i bën thirrje të gjitha partive politike të përfaqësuara në Kuvendin e Kosovës që të respektojnë këtë vendim dhe të gjejnë kompromisin dhe shumicën e nevojshme për të përparuar me procesin e zgjedhjes së Kryetarit dhe Zëvendëskryetarëve. Nuk ka më kohë për të humbur në një ngërç politik!”, vijon deklarata e BE-së.
Kjo thirrje vjen pas vendimit të Gjykatës Kushtetuese e Kosovës, e cila urdhëroi deputetët që përmes votimit të hapur të zgjedhin kryetarin e ri të Kuvendit dhe ta përmbyllin konstituimin e tij brenda një afati prej 30 ditësh.
Procesi i konstituimit të Kuvendit të ri ka ngecur prej disa javësh për shkak të mosmarrëveshjeve politike mes partive kryesore parlamentare, duke krijuar kështu një ngërç që po pengon ngritjen e institucioneve.
