BE-ja ka nisur një operacion humanitar ajror në Mianmar, me fluturimin e parë që niset sot nga Kopenhagen për në Yangon.
Më shumë se 2800 njerëz janë nxjerrë të vdekur nga rrënojat e ndërtesave në Mianmar pas një tërmeti me magnitudë 7.7 ballë që rrafshoi zonat, duke e futur vendin në krizë të thellë. Komisioni njoftoi se Bashkimi Evropian po kanalizon ndihmë të mëtejshme në Mianmar, me një urë humanitare dhe furnizime të mbledhura për shpërndarje.
Konkretisht, BE-ja ka nisur një operacion humanitar urë ajrore, me fluturimin e parë që niset sot nga Kopenhagen për në Yangon. Ngarkesa prej 80 tonësh e furnizimeve nga BE, përfshijnë tenda, pajisje për mbrojtjen e fëmijëve, pajisje shëndetësore, pajisje uji dhe do t’i dërgohen UNICEF-it, njoftoi Komisioni.
Siç u njoftua pas aktivizimit të Mekanizmit të Mbrojtjes Civile të BE-së nga Zyra e OKB-së për Koordinimin e Çështjeve Humanitare, një ekip prej 12 ekspertësh evropianë do të vendosen në Bangkok dhe Kuala Lumpur në ditët në vijim për të siguruar që ndihma nga shtetet anëtare të BE-së të arrijë tek ata që kanë nevojë.
“Për të siguruar mbështetje brenda orëve më kritike pas katastrofës, BE aktivizoi shërbimin satelitor Copernicus për të lehtësuar vlerësimin e ndikimit dhe lëshoi 2.5 milionë euro ndihmë humanitare. “Sot, BE po lëshon gjithashtu 500,000 euro shtesë duke kontribuar në Federatën Ndërkombëtare të Shoqatave të Kryqit të Kuq dhe Gjysmëhënës së Kuqe,” tha Komisioni.
Numri i të vdekurve nga tërmeti është rritur në 2886, sipas televizionit shtetëror, ndërsa përpjekjet e kërkim-shpëtimit vazhdojnë.
MRTV raportoi se 4,639 persona u plagosën dhe 373 rezultojnë të zhdukur, sipas shifrave të mëngjesit të së mërkurës. Në Tajlandën fqinje, numri i të vdekurve nga tërmeti u rrit në 22, ndërsa qindra ndërtesa u dëmtuan dhe 72 persona rezultojnë të zhdukur.
