Korrupsioni ndër vite është problemi numër 1 i Maqedonisë së Veriut, i cili sipas organizatave të brendshme dhe ndërkombëtare është i pranishëm në përmasa pandemike. Akoma më shqetësues mbetet niveli i pandëshkueshmërisë – ku figurat korruptive që kanë shpërdorur pozitën zyrtare prej vitesh nuk janë ndëshkuar – gjë që ka bërë që qytetarët të mos u besojnë institucioneve shtetërore.
Megjithatë, krahas këtyre vlerësimeve për gjendjen me luftën kundër korrupsionit, sot BDI lavdërohet se ka pasur rol pionieri në avancimin e qeverisjes së mirë dhe përpjekjeve kundër korrupsionit. Në një komunikatë të fundit, BDI-ja merr meritat si pjesë e angazhimit rajonal, evropian e ndërkombëtar, si dhe për miratimin e strategjive kombëtare për luftën kundër korrupsionit.
Puna matet me atë që korr, jo me atë që mbjell – thotë një fjalë popullore që mbase përshkruan më së miri trashëgiminë institucionale dhe politike që ka lënë BDI-ja nga qeverisja e saj 22-vjeçare. Për ironi, dy vitet e fundit të qeverisjes, BDI-së i janë futur në Listë të Zezë të SHBA-së dy funksionarë të lartë partiakë pikërisht për çështje korrupsioni, gjegjësisht Ramiz Merko dhe Artan Grubi, për të cilin madje në mënyrë taksative theksohet se ka marrë ryshfet për të shpëtuar ish shefin e Policisë Sekrete Sasho Mijallkov. Nga BDI-ja thonë se kanë luftuar korrupsionin duke miratuar qindra ligje dhe akte nënligjore. Megjithatë, deputetët e partisë së Ahmetit në shtator të vitit 2023 votuan ndryshimet skandaloze të Kodit Penal, të cilat prodhuan efekt negativ të përmasave epike në luftën kundër korrupsionit. Konkretisht, shpëtuan qindra funksionarë të përfshirë në shpërdorim detyre. Ndryshimet e tilla, u përmendën edhe në raportin e Departamentit Amerikan të Shtetit, që u cilësuan si korrupsion serioz qeveritar. Organizatat civile kanë argumentuar se me këtë akt, qeveria krijoi mundësi të gjera për korrupsion.
Këtë e tregojnë qartë edhe rezultatet e Transparency International nga Indeksi i Perceptimit të Korrupsionit. Në dekadën e fundit, ku BDI-ja ka qenë pjesë e Qeverisë, vendi ka rënë vazhdimisht në listë, duke mbetur në grup me vendet afrikane e aziatike, shumë larg vendeve evropiane. Nga gjithsej 180 vende të përfshira, Maqedonia e Veriut renditet e 88-ta. Ndërsa, nga 100 pikët që do të nënkuptonin pastërtinë e shtetit nga korrupsioni, Maqedonia ka mbledhur vetëm 40. Në shumë hulumtime të shoqërisë civile, korrupsioni është një prej arsyeve pse të rinjtë ikin. Sipas anketave të kryera, kjo tendencë është vazhdimisht në rritje.
Kur BDI-ja erdhi në pushtet, të rinjtë përbënin 23,8% të popullsisë, ndërsa dy vite para se të shkonte në opozitë, të rinjtë përbënin 17,8% të popullsisë. Sipas hulumtimeve të Reaktor, gjatë kësaj periudhe janë larguar nga shteti 150 mijë të rinj. Sipas një ankete të Fondacionit për Demokraci Vestminster, 83% e të rinjve lënë shteti kryesisht për shkak të nivelit të lartë të korrupsionit. Ndërsa rezultatet dhe shifrat flasin vetë për situatën, BDI-ja thotë se tani është e përkushtuar për një kapitull të ri, me reforma dhe veting, e ndjekur nga e kaluara e saj. /Alsat.mk
