BDI dënon me ashpërsi përpjekjet e vazhdueshme të qeverisë për të imponuar frymën anti-Ohër nëpërmjet propozimeve ligjore që synojnë krijimin e supremacisë etnike dhe minimin e barazisë multi-etnike, që është thelbësore për stabilitetin dhe ardhmërinë e Maqedonisë së Veriut.
Ndryshimet e propozuara në ligjin për arsimin e mesëm, të cilat ndër të tjera parashikojnë:
– Përdorimin asimetrik të gjuhës dhe alfabetit në në dokumentet pedagogjike,
– Zhvillimin e aktiviteteve kulturore vetëm në frymën e traditës maqedonase dhe historisë nacionale, duke margjinalizuar kulturën dhe kontributin e komuniteteve të tjera etnike në vend.
– Paragrafët që përjashtojnë identitetin multi-etnik në shkollat e mesme dhe promovojnë një dominim të një narrative të njëanshme etnike, duke shkelur barazinë e garantuar nga Marrëveshja e Ohrit dhe Kushtetuta.
Këto dispozita përbëjnë një sulm të hapur ndaj themeleve të barazisë ndëretnike dhe një përpjekje për të vendosur dominim etnik, që bie ndesh me frymën dhe qëllimin e Marrëveshjes së Ohrit.
Në vend që të promovojë bashkëjetesën dhe përfshirjen, qeveria po nxit përçarje dhe pasiguri në shoqërinë tonë.
Këto ndryshime dëmtojnë jo vetëm kohezionin shoqëror, por edhe imazhin e Maqedonisë së Veriut në sytë e partnerëve ndërkombëtarë, duke e kthyer vendin në një prej prioritetit të parë të Komunitetit Evropian për Menaxhimin e Krizave.
Të a.q përfaqësuesit shqiptarë të zgjedhur në qeveri nga ana e VMRO-DPMNE së, që mbështesin heshturazi ose hapur këto përpjekje, duhet të ndihen të turpëruar për veprimet e tyre.
Këto sjellje përbëjnë tradhti ndaj interesave të qytetarëve shqiptarë dhe një përulje ndaj axhendave të njëanshme që dëmtojnë të ardhmen multi-etnike të vendit.
BDI i bën thirrje qeverisë që të ndalojë menjëherë këto përpjekje të rrezikshme dhe destruktive.
Zgjidhja e vetme për të mbrojtur të ardhmen e vendit është kthimi në dialogun e hapur dhe respektimi i frymës së Marrëveshjes së Ohrit, që ka siguruar stabilitet dhe progres për të gjithë qytetarët.
