Barcelona nuk e ka nisur sezonin e ri në mënyrën më të lehtë, dhe problemet janë thelluar me lajmin se Alejandro Balde ka pësuar një lëndim në kofshë gjatë stërvitjes.
Të mërkurën pasdite, klubi katalanas konfirmoi përmes një raporti mjekësor zyrtar se Balde ka marrë një lëndim “të lehtë” në kofshën e majtë gjatë seancës stërvitore të mëngjesit.
“Mbrojtësi Alejandro Balde pësoi një lëndim të lehtë në kofshën e majtë gjatë stërvitjes së sotme. Disponueshmëria e tij do të varet nga mënyra se si do të përparojë,” thuhej në njoftimin e klubit.
Ky është lëndimi i dytë në gjashtë muaj që mbrojtësi 21-vjeçar pëson në të njëjtin vend, pasi në prill kishte pësuar një tjetër gjatë fitores ndaj Leganes. Për më tepër, ai kishte këputur muskujt në janar 2024 kundër Athletic Club në “San Mames”.
Barcelona nuk ka dhënë një afat rikthimi, por sipas gazetares Helena Condis, Balde pritet të mungojë rreth tre javë. Kjo do të thotë se ai nuk do të jetë i gatshëm për ndeshjet e La Ligës ndaj Valencias, Getafes dhe ndoshta edhe Real Oviedos, si dhe për ndeshjen e parë të Ligës së Kampionëve kundër Newcastle United në “St James’ Park”.
Mungesa e Balde përkon me rikthimin e Gerard Martin në ekipin e parë, i cili u regjistrua në La Liga pak para barazimit të fundjavës ndaj Rayo Vallecano. Ai pritet të startojë në këto ndeshje, ndërsa mundësi mund të marrë edhe adoleshenti Jofre Torrents, i cili ka lënë përshtypje të mira te Hansi Flick gjatë parasezonit.
Megjithëse për Barcelonën nuk është situatë ideale të mbetet pa Balde, ekziston një ndjenjë lehtësimi që mungesa e tij pritet të zgjasë vetëm tre javë. Sidoqoftë, fakti që lojtari vazhdon të pësojë lëndime të përsëritura në kofshë mbetet një shqetësim serioz, të cilin stafi mjekësor mund ta analizojë në të ardhmen.
