Tifo-grupi “Ballistët” përmes një komunikate të publikuar nëpër rrjetet sociale kanë reaguar ndaj vendimit të FFM-së që dënoi Shkëndijën e Tetovës me 5 ndeshje pa prezencë dhe tifozëve dhe me 6.000 euro gjobë.
Sipas tyre, bëhet fjalë për vendim tendencioz, të padrejtë dhe selektiv.
“Federata e futbollit të mafias, sot solli vendim ku klubi jonë Shkëndija dënohet me 5 ndeshje pa publikë!!! Vendim tendencioz ky, ku dihet se Shkëndija është favorit kryesor për të fituar titullin kampion, ndalohen tifozët për t’ja vështirësuar rrugën drejt qëllimit final. E konsiderojmë të padrejtë dhe selektiv këtë vendim” – thuhet në reagimin e “Ballistëve”.
“Ballistët” dyshojnë edhe për standard të dyfishta me rastin e shqiptimit të dënimeve nga ana e autoriteteve sportive.
“Ju ofrojmë një shembull të freskët ku për sharrjet dhe ofendimet e tifozëve të KB Kumanova, dhe sulmit të autobusit me mbishkrime kundrejt shqiptarëve si nacionalitet, ekipi i tyre dënohet me 2 ndeshje pa publikë dhe një shumë simbolike, qesharake 500 euro” – thuhet në reagim.
“Ballistët” pranojnë se u thye heshtja nga një pjesë e tifozerisë së tyre, por mohojnë se ka patur ofendime në baza nacionale. Kërkojnë nga autoritetet e FFM-së që dënimi të hiqet.
“Nga ana jonë nuk kishte ofendime, në bazë nacionale apo të ngjajshme, vetëm se u thye heshtja nga një pjesë e Ballistëve me një këngë kushtuar klubit tonë, u pezullua i gjithë publiku! KËRKOJMË HEQJEN E DËNIMIT!!!” – thuhet në reagimin e tifo-grupit “Ballistët”.
