Kandidati i VLEN-it për prefekt të Shkupit, Bashkim Bakiu, ka reaguar ashpër ndaj deklaratës së sotme të Denko Maleski–Frçkovskit, i cili në vitin 2025 pretendon se në vitet ’90 paska dashur ta fusë gjuhën shqipe në Kushtetut, por gjoja partitë tjera e kanë kundërshtuar.
“Pa fije turpi, Frçkovski del e flet sikur të mos ishte i njëjti aktor i ngjarjeve tragjike të Bit Pazarit, i dhunës së Gostivarit ’97, dhe autor i deklaratave të turpshme për Universitetin e Tetovës, të cilin e quajti ‘mrtvorodence’ (foshnjë e lindur e vdekur). Ai harron se shqiptarët nuk e kanë amnezi historike”, shkruan Bakiu.
Ai shton se kjo lojë e vjetër politike përsëritet gjithmonë kur Frçkovski është në opozitë, duke u shfaqur si “mik i shqiptarëve”, ndërkohë që në vitet e ’90-ta ishte, siç thotë Bakiu, “gjakpirës”.
“Me sa duket, disa shqiptarë ende i thonë ‘grahi’ Frçkovskit, sikur shqiptarët nuk mbajnë mend. Por jo! Amerikanët kanë një thënie të qartë: forgive but not forget. Ne nuk kemi harruar dhe as nuk e falim!”, përfundon kandidati i VLEN për prefekt të Shkupit, Bashkim Bakiu.
