Azizi: BDI e mbush sheshin me karrige, ne e mbushëm me njerëz!

Shefi i Shtabit Qendror, Adnan Azizi, në tubimin përmbyllës të VLEN-it në Tetovë tha se BDI e ka lëshuar bajrakun në Kërçovë, po ashtu edhe në Strugë, Çair dhe kudo tjetër.
“Ata edhe mbrëmë e dorëzuan luftën mu në sheshin e Tetovës. Për herë të parë, BDI, pasi që nuk kishte askund njerëz dhe mbështetës, e mbushi sheshin me karrige, vetëm për të fshehur faktin se nuk mundi ta mbushte me qytetarë. Ata i kanë braktisur qytetarët dhe kanë mbetur me salla bosh. Në Tetovë nuk mund të mbajnë tubim me dhjetëra autobusa menzi arritën të mbledhin dy mijë veta, ndërsa ne këtu jemi me mijëra”, tha Azizi.
Sipas tij, kundërshtarët politikë kanë kaluar në sharje dhe ofendime, pikërisht sepse ndjejnë humbjen e madhe që po u vjen.
“Ata shanë motrat tona në Kërçovë dhe përdhosën dinjitetin e grave shqiptare. Para disa kohësh shanë e ofenduan, madje shanë edhe 700 mijë nënat shqiptare, shanë dhe ofenduan edhe heronjtë kombëtarë, shanë dhe ofenduan edhe Profetin Muhamed. A e dini pse janë në këtë frustrim? Sepse e dinë që më 19 tetor do të pësojnë humbjen më të madhe në historinë e tyre”, tha Azizi.
Ai shtoi se Bilall Kasami ka prapa vetes një mal projektesh të realizuara, një vizion të qartë dhe projekte konkrete që do t’i zbatojë në mandatin e ardhshëm.