Atletico Madrid përballet me një tjetër sfidë të madhe në Champions League, teksa do të ndeshet me rivalin historik, Real Madrid, në 1/8 e finales të martën në “Santiago Bernabeu”. Pavarësisht bilancit negativ në përballjet e mëparshme, trajneri Diego Simeone beson se skuadra e tij ka një mundësi për të shkruar historinë.
Në katër përplasjet e fundit në këtë kompeticion, Atletico ka dalë gjithmonë e mposhtur nga Real Madrid, përfshirë humbjet e dhimbshme në finalet e viteve 2014 dhe 2016. Megjithatë, këtë sezon “Los Colchoneros” po tregojnë një formë të shkëlqyer dhe aktualisht renditen në vendin e dytë në La Liga, dy pikë përpara rivalëve të tyre të qytetit.
Në konferencën për shtyp para ndeshjes, Simeone ka shprehur besimin në ekipin e tij: “Po përballemi me një kundërshtar që e respektojmë. E dimë forcën tonë, do të luajmë me potencialin maksimal dhe do të përpiqemi ta çojmë ndeshjen atje ku mund t’i bëjmë dëm”, ka thënë ai.
Trajneri argjentinas e ka pranuar se historia është në favor të Reali, por Atletico ka një mundësi të artë për të ndryshuar rrjedhën e përballjeve. “Historia ekziston, dhe ajo e Real Madridit në Champions League është e jashtëzakonshme. Por nesër do të kemi një mundësi të re…”, ka thënë ai.
Simeone e ka konsideruar këtë sfidë si një moment madhor jo vetëm për ekipin e tij, por për të gjithë të përfshirët: “Për qytetin është diçka spektakolare, për Spanjën, të ketë një ekip spanjoll në çerekfinale, dhe për ne që do ta luajmë këtë ndeshje, do të jetë një kënaqësi”, është shprehur ai.
