Carlo Ancelotti dhe Real Madrid kanë arritur një marrëveshje për ndërprerjen e kontratës së trajnerit italian para përfundimit të sezonit, sipas një raporti nga The Athletic.
Trajneri italian ka rënë dakord me klubin madrilen për ndërprerjen e kontratës aktuale dhe pritet të marrë drejtimin e kombëtares së Brazilit në qershor, kur kjo e fundit do të përballet me Ekuadorin dhe Paraguajin në kualifikueset e Kupës së Botës 2026, pas humbjes 4-1 në ndeshjen e fundit kundër Argjentinës.
Ancelotti më pas pritet të udhëheqë Brazilin në Kampionat Botëror 2026, që do të mbahet në SHBA, Kanada dhe Meksikë.
Duke folur për të ardhmen e tij përpara ndeshjes së fundjavës në La Liga që Madridi e fitoi 3-2 ndaj Celta Vigos, ai u shpreh:
“E respektoj Real Madridin, e dua këtë klub. Prandaj nuk mund t’ju përgjigjem se çfarë do të ndodhë me të ardhmen time pas datës 25 maj.”
Sipas raportit, është e mundur që klubi të sqarojë publikisht të ardhmen e Ancelottit pas El Clasicos së ardhshme ndaj FC Barcelonës më 11 maj.
Në javët e fundit ka pasur shumë pasiguri rreth së ardhmes së trajnerit italian.
Raporte të ndryshme sugjeronin se marrëveshja me Brazilin kishte dështuar pasi Federata Braziliane kishte ndërprerë negociatat, por tensionet janë zbutur dhe tashmë duket se Ancelotti është gati për një kapitull të ri me Seleçaon.
Real Madrid u eliminua nga Arsenali në çerekfinalet e Ligës së Kampionëve dhe humbi finalen e Copa del Rey 3-2 kundër Barcelonës, por vazhdon të jetë në garë për titullin në La Liga, ku aktualisht renditet i dyti me vetëm katër pikë më pak se Barcelona e trajnerit Hansi Flick.
El Clasico më 11 maj në Barcelonë mund të jetë e fundit për Ancelottin në krye të Realit.
Zëvendësimi i tij më i mundshëm është trajneri aktual i Bayer Leverkusen, Xabi Alonso, i cili prej kohësh është përfolur si zgjedhja kryesore e presidentit Florentino Perez.
Megjithatë, Alonso nuk pritet të marrë drejtimin e skuadrës për Kupën e Botës për Klube këtë verë në SHBA.
Ai dhe Leverkusen kanë një marrëveshje informale që do ta lejonte të largohej në rast se Real Madrid bën thirrjen zyrtare.
Ancelotti është një nga trajnerët më të suksesshëm në historinë e futbollit, me 31 trofe të mëdhenj të fituar në Itali, Francë, Gjermani, Spanjë dhe Angli.
Ai është i vetmi trajner që ka fituar titujt kampion në të pesë ligat kryesore të Europës dhe mban rekordin për më shumë trofe të Champions League (5) dhe UEFA Superkupë (5) si trajner. Fitorja e një trofeu të madh me Brazilin do të ishte një tjetër kulm në karrierën e tij legjendare.
Brazili, ndërkohë, mbetet e vetmja kombëtare që është kualifikuar në çdo Kupë Bote në histori.
