Një ngjarje e rëndë ka shoqëruar sistemin e drejtësisë në vend. Një prokuror nga Prokuroria Themelore në Prizren është arrestuar sot në orët e para të mëngjesit, pas një aksioni të realizuar nga Policia e Kosovës me urdhër të Prokurorisë Speciale të Republikës së Kosovës, mëson Gazeta Sinjali.
Burime të besueshme brenda hetimit bëjnë të ditur se i arrestuari është Beqe Shala, prokuror në Departamentin e Përgjithshëm të Prokurorisë në Prizren. Ai dyshohet për marrje ryshfeti dhe keqpërdorim të pozitës apo autoritetit zyrtar.
Arrestimit i ka paraprirë bastisja në shtëpinë e tij, ku janë sekuestruar materiale dhe prova që lidhen me dyshimet e ngritura.
Sipas informacioneve të Sinjalit, Shala ka qenë nën masa të fshehta të hetimit prej disa kohësh, në koordinim të ngushtë ndërmjet Policisë dhe Prokurorisë Speciale.
Hetimet janë duke vazhduar për ndriçimin e plotë të veprimtarive të dyshuara, ndërsa pritet që gjatë ditës të jepen më shumë detaje rreth rastit dhe masave që do të merren ndaj prokurorit të arrestuar.
