Përfaqësuesit nga SHBA dhe Rusia mbajtën bisedime me dyer të mbyllura në Stamboll, me qëllim zgjidhjen e mosmarrëveshjeve mbi punën e ambasadave të tyre përkatëse pas disa vitesh që dëbuan diplomatët e njëri-tjetrit.
Zëdhënësi i Kremlinit Dmitry Peskov tha se bisedimet në Stamboll pasuan një mirëkuptim të arritur gjatë telefonatës së Presidentit Donald Trump me Presidentin rus Vladimir Putin dhe bisedimeve midis diplomatëve të lartë rusë dhe amerikanë dhe zyrtarëve të tjerë të lartë në Arabinë Saudite.
Në një konferencë, Presidenti rus Vladimir Putin, u shpreh se ekziston një vendosmëri reciproke për të punuar për rivendosjen e marrëdhënieve ndërshtetërore.
“Ne të gjithë shohim se sa shpejt po ndryshon situata në botë. Në këtë drejtim, dua të vërej se kontaktet e para me administratën e re amerikane ngjallin shpresa për zgjidhjen graduale të problemeve të akumuluara. Është e rëndësishme që partnerët tanë aktualë të demonstrojnë pragmatizëm, një pamje realiste të gjërave dhe të hedhin poshtë shumë stereotipe”, tha Putin.
Kreu i Kremlinit vuri në dukje se jo të gjithë në Perëndim janë të kënaqur me rifillimin e dialogut midis Moskës dhe Uashingtonit. Sipas Putin në të njëjtën kohë, veprimet e vendeve perëndimore çuan në prishjen e strukturës së tyre të brendshme dhe u përballën me probleme ekonomike.
Ministri i Jashtëm rus Sergej Lavrov vuri në dukje se bisedimet në Stamboll u fokusuan në “problemet sistemike që janë grumbulluar si rezultat i aktiviteteve të paligjshme të administratës së mëparshme të SHBA-së që krijuan pengesa artificiale për punën e ambasadës ruse”.
Departamenti Amerikan i Shtetit tha se rezultati i këtyre bisedimeve do të shihet nëse Rusia është vërtet e gatshme të angazhohet me mirëbesim në negociata. Zëdhënësi i Kremlinit në një deklaratë bëri të ditur se dialogu me Shtetet e Bashkuara duhet të ecë përpara për sa kohë që ka vullnet politik nga të dyja palët dhe një gatishmëri për të dëgjuar njëri-tjetrin.
