Departamenti amerikan i Drejtësisë informon Zërin e Amerikës se stafi i tij mund të rinisë transmetimin e programeve javën e ardhshme.
VOA, që është transmetues i financuar nga shteti amerikan, ka audiencë ndërkombëtare dhe është mbyllur që kur Trump urdhëroi Agjencinë amerikane për Media Globale (USAGM), që mbikëqyr VOA dhe transmetues të tjerë – përfshirë Radion Evropa e Lirë –dhe gjashtë agjenci të tjera federale, që të reduktonin në minimumin e kërkuar nga ligji punën e tyre.
“Një avokat i Departamentit të Drejtësisë i ka dërguar një email avokatit tonë, për ta informuar që USAGM pret që stafi i Zërit të Amerikës të mund të nisë ‘rikthimin me faza’ në punë dhe transmetimi të rinisë javën e ardhshme”, tha gazetari i këtij institucioni, Steve Herman në një postim në X. Organizata “Reporterët pa Kufij” tha se USAGM ka aktivizuar llogaritë e 1406 punëtorëve përfshirë dhe ato të Zërit të Amerikës dhe bashkëpunëtorëve, thuhet në emailin e dërguar nga Departamenti i Drejtësisë.
Pas vendimit të Trump që çoi në shtëpi më shumë se 1.000 punonjës dhe ndërpreu kontratat me rreth 600 bashkëpunëtorë, duke e detyruar Zërin e Amerikës, që për herë të parë që nga themelimi më 1942, të ndalë transmetimin. Më 21 mars, VOA ngriti padi ndaj administratës Trump, duke argumentuar se lëvizjet për mbylljen e transmetuesit ishin të paligjshme.
