Kryetarja e Komisionit Shtetëror për Parandalimin e Korrupsionit, Biljana Ivanovska, ka bërë të ditur se komisioni do të hap rast për nipërit e liderit të BDI-së, Ali Ahmeti, gjegjësisht për avancimin e Besian Ahmetit në postin e sekretarit të parë të ambasadës së Maqedonisë në Bruksel, si dhe për ndarjen e mjeteve shtetërore nga Fondi për Inovacion dhe Zhvillim Teknologjik (FITR) për Drin Ahmetin.
Ajo tha se për të fituar një pozicion ose për të ushtruar një të drejtë, duhet të kalohen nëpër disa procedura të përcaktuara.
“Nëse shkelen apo nuk respektohen, atëherë bëhet fjalë për ndikim. Kështu provojmë ndikim. Dokumentet do t’i kërkojmë për nipin e Ahmetit që ka punuar në ekonomi dhe ka shkuar në Bruksel. Pra, do të kontrollojmë se si ka arritur në atë pozitë”, tha Ivanovska, por shtoi se është shumë e vështirë të vërtetohet ekzistimi i ndikimit në tregti.
