Pas sukseseve të njëpasnjëshme në skenën ndërkombëtare, Ansambli “Ibe Palikuqi” ka marrë ftesën e radhës për të përfaqësuar kulturën shqiptare në festivalin më prestigjioz të Republikës së Bullgarisë, që do të mbahet nga 18 deri më 21 Shtator 2025 në Komunën Septemvri, Pazardzhik. Kjo është ftesa e katërt ndërkombëtare vetëm për këtë vit, duke vulosur një vit të jashtëzakonshëm për ansamblin.
Festivali njihet për organizim profesional dhe standarde të larta artistike, ku përfaqësuesit përzgjidhen në bazë të kritereve të rrepta. Kjo është një tjetër arritje e madhe për Shkollën e Kulturës Shqiptare “Ibe Palikuqi” nga Shkupi, e cila përmes ansamblit të saj po promovon me sukses trashëgiminë kulturore shqiptare në skenat ndërkombëtare.
Përfaqësimi i denjë i shqiptarëve të Maqedonisë së Veriut nga “Ibe Palikuqi” është bërë burim krenarie për të gjithë komunitetin, duke dëshmuar se kultura jonë ka zë dhe vend në botë.
