Aliu: Vazhdojmë me digjitalizimin, me një vizion për shëndetësi që funksionon!

Ministria e Shëndetësisë sot promovoi modulin e ri për evidentim elektronik të kontrolleve shëndetësore në fushën e mjekësisë së punës – i pari i këtij lloji në vend.
Me këtë modul digjital, i cili është zhvilluar në bashkëpunim mes Drejtorisë për Shëndetësi Elektronike, Institutit për Mjekësi të Punës dhe Shoqatës së Mjekëve Specialistë, procesi i lëshimit të vërtetimeve mjekësore dhe kryerja e kontrolleve shëndetësore për punësim, drejtim automjetesh, mbajtje arme dhe qëllime të tjera, kalon nga letra në sistemin “Termini im”.
“Ky modul sjell përfitime reale për qytetarët, punonjësit shëndetësorë dhe punëdhënësit. Çdo evidentim i kryer do të jetë pjesë e dosjes elektronike, ndërsa sistemi do të mundësojë gjenerimin automatik të raportit mjekësor,” – deklaroi ministri Aliu, duke nënvizuar se kjo është një arritje domethënëse në procesin e digjitalizimit të shëndetësisë.
Risia mundëson:
✔ Regjistrime elektronike për të gjitha llojet e kontrolleve që lidhen me aftësinë për punë
✔ Gjenerim të raporteve me opinion mjekësor dhe rekomandime
✔ Qasje në të dhëna në kohë reale
✔ Identifikim të mjekëve përmes licencës apo vulës
✔ Lidhje me institucione përmes interoperabilitetit
Në fazën e ardhshme, do të krijohet edhe portal për punëdhënësit, integrim me dosjet shëndetësore dhe digjitalizim i plotë i të gjitha dokumenteve. Qëllimi është një sistem i thjeshtë, i sigurt dhe efikas, i qasshëm për të gjithë.
Vazhdojmë me digjitalizimin, me një vizion për shëndetësi që funksionon!