Ministria e Shëndetësisë ka prezantuar një modul të ri elektronik për donacione, me qëllim që të ofrojë një pasqyrë transparente të të gjitha donacioneve të pranuara nga kjo ministri si dhe nga të gjitha institucionet publike shëndetësore. Moduli është i qasshëm në faqen zyrtare të internetit: donacii.zdravstvo.gov.mk dhe mundëson një pasqyrë të detajuar të çdo donacioni, me të dhëna për donatorin, vlerën e donacionit, si dhe informacione për llojin e donacionit dhe nëse janë donuar materiale mjekësore, pajisje apo të ngjashme.
Siç njoftuna nga ministria, të dhënat statistikore tregojnë se 85% e donacioneve të pranuara deri më tani përbëhen nga materiale mjekësore, përfshirë barna, vaksina, pajisje për disa institucione publike shëndetësore dhe materiale të tjera.
„Nga vetë moduli mund të shihet se donacionet vijnë nga një spektër i gjerë donatorësh – nga institucione dhe organizata ndërkombëtare, shtete dhe fondacione humanitare. Pikërisht mbështetja e tyre është dëshmi kyçe për besimin dhe rëndësinë që ka sistemi jonë shëndetësor. Deri më tani në modul janë evidentuar mbi 400 donacione, ndërsa procesi i regjistrimit është ende në vazhdim dhe ky numër do të rritet, gjë që tregon se po rritet besimi i partnerëve ndërkombëtarë dhe shteteve mike në sistemin tonë shëndetësor“ , deklaroi ministri i Shëndetësisë, Azir Aliu.
Ai tha se, qëllimi është të sigurohet koordinimi dhe aprovimi i donacioneve, si dhe të shmangen situatat kur arrijnë pajisje me sisteme operative të ndryshme ose pajisje për të cilat nuk ka pjesë rezervë apo shërbim teknik të qasshëm në vendin tonë.
„Me këtë modul po dërgojmë një mesazh të qartë se në shëndetësi nuk ka procese të fshehta apo marrëveshje sekrete, se çdo donacion është i dukshëm, çdo ndihmë është e evidentuar dhe çdo qytetar ka të drejtë të informohet“ , përfundoi ministri Aliu.
