Lideri i BDI-së Ali Ahmeti, ka mbajtur një fjalim të fuqishëm dhe emocionues në tubimin madhështor të Aleancës Kombëtare për Integrim (AKI) në Kërçovë, duke dërguar mesazhe të qarta për unitet, dinjitet dhe përballje me padrejtësitë.
Ahmeti i bëri thirrje qytetarëve që më 19 tetor të dalin si një trup i vetëm për të vendosur për fatin e tyre, duke theksuar se nuk do të lejohet më që sakrificat e bëra me gjak të nëpërkëmben nga ata që e shesin patriotizmin me fjalë, por e tradhtojnë me vepra.
“Më 19 tetor, si një trup i vetëm, do të vendosim për fatin tonë. Nuk ka ndodhur asnjëherë gjë më e keqe për Kërçovën, për Maqedoninë dhe për barazinë e shqiptarëve, sesa kur disa të ashtuquajtur nacionalistë e lanë në baltë atë që u fitua me gjak. Le të lehin sa të duan, ne i dalim zot asaj që është e jona,” deklaroi Ahmeti para turmës.
Ai theksoi se populli nuk do të heqë dorë nga të drejtat legjitime dhe se më 19 tetor do të vijë momenti i llogaridhënies.
“Ne nuk heqim dorë nga e drejta jonë legjitime! Dhe më 19 tetor, ju populli, do t’ua tregoni hesapet atyre. Sepse ata i kanë hipur kalit për së mbrapshti!”
Tubimi në Kërçovë u shënua nga një pjesëmarrje e gjerë qytetare dhe u përshkua nga një atmosferë e fortë mobilizimi, ku mesazhet për bashkim kombëtar dhe rikthim të dinjitetit politik ishin në qendër të fjalimeve
