Kryetari i Komunës së Tetovës, Bilall Kasami, ka njoftuar përmes një postimi në Facebook se Albi Qamili do të jetë bartësi i listës së VLEN për zgjedhjet lokale në Tetovë.
Qamili, megjithëse në moshë të re, njihet si një aktivist i palodhur dhe i përkushtuar ndaj çështjeve shoqërore dhe politike. Ai është diplomuar në Shkenca Politike dhe aktualisht po ndjek studimet pasdiplomike në fushën e së Drejtës Kushtetuese.
Gjatë viteve të fundit, Qmili ka qenë vazhdimisht pranë qytetarëve, veçanërisht të rinjve, duke u angazhuar në organizime, debate dhe iniciativa të ndryshme. Sipas Kasamit, ai përfaqëson më së miri energjinë, vendosmërinë dhe vizionin e brezit të ri që kërkon ndryshim të prekshëm në jetën publike.
“Albi mishëron atë që është më e vyer tek rinia jonë: guximin për të menduar ndryshe, gatishmërinë për të vepruar dhe idealizmin për ta parë vendin të zhvillohet”, ka shkruar ndër të tjera Kasami në postimin e tij.
Me këtë emërim, VLEN synon të sjellë një frymë të re në politikën lokale dhe të garantojë që zëri i të rinjve të dëgjohet e të përfaqësohet denjësisht.
